بی ڈبلیو ایف ورلڈ چیمپئن شپ کے پہلے ہی دن ہندوستان کے نوجوان اسٹار شٹلر آیوش شیٹی نے بڑا اپ سیٹ کرتے ہوئے عالمی نمبر ایک اور موجودہ چیمپئن چین کے شی یو کی کو شکست دے دی۔ آیوش نے سخت مقابلے میں چینی اسٹار کو 21-14، 13-21، 21-19 سے مات دے کر دوسرے راؤنڈ میں جگہ بنالی۔شی یو کی کے خلاف چار مقابلوں میں یہ آیوش کی پہلی کامیابی ہے۔ اس سے قبل وہ چینی کھلاڑی کے خلاف اپنے تینوں مقابلے ہار چکے تھے، جن میں بیڈمنٹن ایشین چیمپئن شپ کا فائنل بھی شامل تھا۔
پہلے گیم میں آیوش کا شاندار آغاز
پہلے راؤنڈ کے سب سے دلچسپ سنگلز مقابلوں میں شامل اس میچ میں آیوش نے ٹاپ سیڈ شی کے خلاف شاندار آغاز کیا اور ابتدا ہی میں 3-0 کی برتری حاصل کرلی۔ ہندوستانی شٹلر نے اپنی رفتار برقرار رکھتے ہوئے مڈ گیم بریک تک اس برتری کو 11-5 کر دیا۔بریک کے بعد بھی آیوش نے میچ پر گرفت مضبوط رکھی اور شی کو واپسی کا موقع نہیں دیا۔ انہوں نے پہلا گیم 21-14 سے اپنے نام کر لیا۔
دوسرے گیم میں چینی چیمپئن کی واپسی
دوسرے گیم میں شی یو کی نے جارحانہ کھیل کا مظاہرہ کرتے ہوئے 3-1 کی برتری حاصل کرلی۔ آیوش نے جلد ہی اس فرق کو کم کیا اور اسکور 4-4 سے برابر کر دیا۔ دونوں کھلاڑیوں کے درمیان زبردست مقابلہ جاری رہا اور کئی مرتبہ برتری تبدیل ہوئی۔ تاہم شی نے دباؤ برقرار رکھا اور مڈ گیم بریک تک 11-9 کی برتری حاصل کرلی۔ بریک کے بعد چینی کھلاڑی نے اپنی رفتار مزید تیز کی اور برتری کو پانچ پوائنٹس تک پہنچا دیا۔ آیوش کو کچھ غلطیوں کا بھی سامنا کرنا پڑا اور شی نے دوسرا گیم 21-13 سے جیت کر مقابلہ فیصلہ کن گیم تک پہنچا دیا۔
فیصلہ کن گیم میں آیوش کا کمال
فیصلہ کن گیم کا آغاز برابری سے ہوا، لیکن آیوش نے شاندار واپسی کرتے ہوئے پہلے 6-3 اور پھر 9-4 کی برتری حاصل کرلی۔ مڈ گیم انٹرول تک ہندوستانی کھلاڑی 11-5 سے آگے تھے۔سائیڈ تبدیل کرنے کے بعد بھی آیوش نے اپنا دھیان نہیں بھٹکنے دیا اور برتری کو 14-5 تک پہنچا دیا۔ ایک وقت میں شی 5-16 سے پیچھے تھے، جس کے بعد میچ میں واپسی ان کے لیے انتہائی مشکل نظر آنے لگی۔
چار میچ پوائنٹس بچانے کے باوجود شی ہارے
آخری لمحات میں آیوش کی چند غلطیوں کا فائدہ اٹھاتے ہوئے شی نے فرق کم کیا اور اسکور کو پہلے چھ اور پھر چار پوائنٹس تک پہنچا دیا۔ اس کے باوجود آیوش نے دباؤ میں اپنا حوصلہ برقرار رکھا اور 20-15 کی برتری حاصل کرلی۔شی نے چار میچ پوائنٹس بچانے کے لیے زبردست جدوجہد کی، لیکن آیوش نے فیصلہ کن لمحات میں شاندار تحمل کا مظاہرہ کیا اور 21-19 سے گیم جیت کر عالمی نمبر ایک کھلاڑی کے خلاف یادگار فتح اپنے نام کرلی۔ یہ کامیابی آیوش شیٹی کے لیے نہ صرف ورلڈ چیمپئن شپ کا شاندار آغاز ہے بلکہ ان کے کیریئر کی اہم ترین فتوحات میں بھی شمار کی جائے گی۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
