Afghanistan Cricket Board: بھارت کے خلاف واحد ٹیسٹ اور ون ڈے سیریز کے لیے افغانستان ٹیم کا اعلان، حشمت اللہ شاہدی کپتان مقرر

نئی دہلی :افغانستان کرکٹ بورڈ (اے سی بی) نے بھارت کے خلاف ہونے والی واحد ٹیسٹ اور تین ایک روزہ میچوں کی سیریز کے لیے اپنی ٹیم کا اعلان کر دیا ہے۔ منگل کو جاری کردہ اسکواڈ کے مطابق حشمت اللہ شاہدی دونوں فارمیٹس میں افغانستان ٹیم کی قیادت کریں گے۔ ٹیسٹ اور ون ڈے سیریز کے لیے 15،15 رکنی ٹیموں کا انتخاب کیا گیا ہے۔بھارت کے خلاف اس اہم سیریز میں افغانستان کی ٹیم کئی تجربہ کار اور اسٹار کھلاڑیوں پر مشتمل ہے۔ راشد خان، رحمان اللہ گرباز، محمد نبی اور عظمت اللہ عمرزئی جیسے کھلاڑی ٹیم کی کامیابی میں اہم کردار ادا کریں گے۔

ون ڈے ٹیم میں افغانستان کی بیٹنگ لائن اپ کافی مضبوط دکھائی دے رہی ہے۔ اوپننگ کی ذمہ داری رحمان اللہ گرباز اور ابراہیم زدران سنبھالیں گے، جب کہ کپتان حشمت اللہ شاہدی، رحمت شاہ اور درویش رسولی مڈل آرڈر کو مضبوطی فراہم کریں گے۔ آل راؤنڈر محمد نبی اور عظمت اللہ عمرزئی بیٹنگ کے ساتھ ساتھ گیندبازی میں بھی ٹیم کے لیے اہم ہتھیار ثابت ہوں گے۔گیندبازی کے شعبے میں راشد خان سب سے بڑی امید سمجھے جا رہے ہیں۔ ان کے ساتھ نوجوان اسپنر اے ایم غضنفر بھی شامل ہیں، جب کہ فاسٹ بولنگ اٹیک میں بلال سمیع، فرید ملک اور ضیا الرحمان شریفی کو جگہ دی گئی ہے۔ ننگیال خروتائی بھی اسکواڈ کا حصہ ہیں، جبکہ قیس احمد، سلیم صافی اور بشیر احمد کو ریزرو کھلاڑیوں میں رکھا گیا ہے۔

ٹیسٹ اسکواڈ میں چند تبدیلیاں دیکھنے کو ملی ہیں۔ عبد المالک، رحمان اللہ زدران اور شرف الدین اشرف کو ریڈ بال ٹیم میں شامل کیا گیا ہے۔ رحمت شاہ اور گرباز نے بھی اپنی جگہ برقرار رکھی ہے۔ وکٹ کیپر کے طور پر اکرام علی خیل اور افسر زازی کو منتخب کیا گیا ہے۔دلچسپ بات یہ ہے کہ راشد خان ٹیسٹ ٹیم کا حصہ نہیں ہیں۔ ٹیسٹ فارمیٹ میں اسپن بولنگ کی ذمہ داری شرف الدین اشرف، قیس احمد اور ننگیال خروتائی کے کندھوں پر ہوگی۔بھارت اور افغانستان کے درمیان واحد ٹیسٹ میچ 6 سے 10 جون تک نیو چندی گڑھ میں کھیلا جائے گا۔ اس کے بعد تین ون ڈے میچوں کی سیریز ہوگی۔ پہلا ون ڈے 13 جون کو دھرم شالہ، دوسرا 17 جون کو لکھنؤ اور تیسرا 20 جون کو چنئی میں کھیلا جائے گا۔ کرکٹ شائقین کو اس سیریز سے دلچسپ مقابلوں کی امید ہے کیونکہ افغانستان کی ٹیم گزشتہ کچھ برسوں میں بین الاقوامی کرکٹ میں مضبوط حریف کے طور پر ابھری ہے۔

بھارت ایکسپریس اردو