جھارکھنڈ کے دھنباد ضلع کے منیڈیہ علاقے میں ہفتہ کی آدھی رات گیس کٹر کے سلنڈر میں دھماکے سے خوفناک حادثہ پیش آیا، جس میں دو افراد کی دردناک موت ہوگئی جبکہ دو دیگر شدید زخمی ہوگئے۔ موصولہ اطلاعات کے مطابق ہفتہ کی رات تقریباً 12 بجے علاقے میں کام جاری تھا کہ اچانک گیس کٹر کے سلنڈر میں زوردار دھماکہ ہوگیا۔ دھماکہ اتنا شدید تھا کہ اس کی آواز دور دور تک سنی گئی۔
عینی شاہدین کے مطابق حادثے کے وقت موقع پر تقریباً 8 سے 10 افراد موجود تھے۔ سلنڈر پھٹتے ہی اس میں بھری گیس تیزی سے ماحول میں پھیل گئی، جس سے وہاں موجود افراد کو سانس لینے میں شدید دشواری پیش آئی اور دم گھٹنے جیسی صورتحال پیدا ہوگئی۔ گیس کے اخراج اور دھماکے کی زد میں آکر چار افراد شدید متاثر ہوئے۔
زخمیوں کی حالت تشویشناک
مقامی لوگوں اور ساتھی کارکنوں کی مدد سے زخمیوں کو فوری طور پر شہید نرمل مہتو میڈیکل کالج اینڈ اسپتال منتقل کیا گیا۔ اسپتال پہنچنے پر ڈاکٹروں کی ٹیم نے فوری علاج شروع کیا۔ حالانکہ، دو افراد کو بچایا نہ جا سکا۔ ڈاکٹروں نے علاج کے دوران سنجے یادو اور محمد اظہرالدین کو مردہ قرار دے دیا، جبکہ زخمی محمد ابراہیم اور محمد امام الدین کا علاج جاری ہے۔ ڈاکٹروں کے مطابق دونوں زخمیوں کی حالت بدستور نازک ہے اور میڈیکل ٹیم مسلسل ان کی نگرانی کر رہی ہے۔
پولیس نے شروع کی تحقیقات
حادثے کی اطلاع ملتے ہی مقامی پولیس موقع پر پہنچ گئی اور جائے حادثہ کا معائنہ کیا۔ ابتدائی تحقیقات میں گیس کٹر کے استعمال کے دوران حفاظتی اصولوں کو نظر انداز کرنے کی بات سامنے آئی ہے۔ پولیس حکام کے مطابق اس بات کی تفصیلی جانچ کی جا رہی ہے کہ آدھی رات کو کس صورتحال میں گیس کٹر استعمال کیا جا رہا تھا اور حفاظ کے کیا انتظامات تھے۔
بھارت ایکسپریس۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
