بنگلورو: وزیر اعظم نریندر مودی جمعہ کے روز بنگلورو پہنچے، جہاں کرناٹک کی گورنر سدھا یادو اور وزیر اعلیٰ ڈی کے شیوکمار نے ان کا گرمجوشی کے ساتھ استقبال کیا۔ وزیر اعظم اپنے دورے کے دوران بنگلورو میں 15,600 کروڑ روپے سے زائد کی لاگت والے مختلف ترقیاتی منصوبوں کا افتتاح، سنگ بنیاد اور انہیں قوم کے نام وقف کرنے کے علاوہ نئی خدمات کا آغاز کریں گے۔
وزیر اعظم کے دفتر (پی ایم او) نے سوشل میڈیا پلیٹ فارم ’ایکس‘ پر ایک پوسٹ میں کہا، ’’بنگلورو پہنچنے پر وزیر اعظم نریندر مودی کا کرناٹک کی گورنر سدھا یادو، وزیر اعلیٰ ڈی کے شیوکمار اور دیگر معزز شخصیات نے استقبال کیا۔ وزیر اعظم آج کئی پروگراموں میں شرکت کریں گے۔‘‘ وہیں وزیر اعلیٰ ڈی کے شیوکمار نے بھی ’ایکس‘ پر پوسٹ کرتے ہوئے کہا کہ کرناٹک آمد پر وزیر اعظم نریندر مودی اور گورنر سدھا یادو کا پرتپاک استقبال کیا گیا۔
پرشانتی کٹیرم کی گولڈن جوبلی تقریب میں شرکت
وزیر اعظم مودی بنگلورو میں ’پرشانتی کٹیرم‘ کی گولڈن جوبلی تقریب میں شرکت کریں گے۔ اس موقع پر وہ وہاں موجود لوگوں سے خطاب بھی کریں گے۔ وزیر اعظم دوپہر تقریباً 12 بج کر 45 منٹ پر تورے کیرے سے آئی آئی ایم بنگلورو میٹرو اسٹیشن تک میٹرو کو ہری جھنڈی دکھائیں گے اور اس میں سفر بھی کریں گے۔
15,600 کروڑ روپے کے ترقیاتی منصوبوں کا افتتاح
دوپہر تقریباً ایک بج کر 15 منٹ پر وزیر اعظم بنگلورو میں 15,600 کروڑ روپے سے زائد کی لاگت والے مختلف ترقیاتی منصوبوں کا سنگ بنیاد رکھیں گے، افتتاح کریں گے اور انہیں قوم کے نام وقف کریں گے۔ ان منصوبوں کا تعلق شہری ٹرانسپورٹ، بجلی کی ترسیل، قابل تجدید توانائی، پیٹرولیم بنیادی ڈھانچے، کچرے کے انتظام اور ریلوے سمیت اہم شعبوں سے ہے۔ اس موقع پر وہ عوامی اجتماع سے خطاب بھی کریں گے۔
میسور میں ملک کے پہلے ایل ای ڈی ڈوم تارامنڈل کا افتتاح
اس کے بعد وزیر اعظم مودی میسور جائیں گے، جہاں دوپہر تقریباً 3 بج کر 30 منٹ پر ’کاسموس۔ میسور تارامنڈل‘ کا افتتاح کریں گے۔ انڈین انسٹی ٹیوٹ آف ایسٹرو فزکس (آئی آئی اے) کے ذریعہ تیار کیا گیا یہ ملک کا پہلا ایل ای ڈی ڈوم تارامنڈل ہے۔ اسے فلکیات کی تعلیم اور تربیت کے ایک اہم مرکز کے طور پر قائم کیا گیا ہے۔ یہ تارامنڈل میسور یونیورسٹی کے کیمپس میں چامنڈی پہاڑیوں کے دامن میں واقع ہے۔
اس کے اسکائی تھیٹر میں پیشہ ورانہ طور پر تیار کیے گئے فلکیاتی پروگرام دکھائے جائیں گے۔ اس کے علاوہ میسور کی تاریخ اور فلکیات کے درمیان تعلق کو اجاگر کرنے والی ایک خصوصی فلم بھی پیش کی جائے گی۔ یہ شوز کنڑ، انگریزی اور ہندی زبانوں میں دستیاب ہوں گے۔ وزیر اعظم اس موقع پر موجود لوگوں سے خطاب بھی کریں گے۔
بھارت ایکسپریس۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
