نئی دہلی: کیا آپ کا بچہ بھی وزیراعظم نریندر مودی سے براہ راست سوال پوچھنا چاہتا ہے؟ تو یہ ایک سنہری موقع ہے۔ مرکزی وزارت تعلیم نے اطلاع دی ہے کہ ’پریکشا پہ چرچا 2026‘ کے لیے رجسٹریشن جاری ہے اور اب تک 1 کروڑ 54 لاکھ 33 ہزار 285 افراد اپنا اندراج کرا چکے ہیں۔
طلبہ، اساتذہ اور والدین سب کے لیے موقع
وزارت تعلیم کے مطابق رجسٹریشن کرانے والوں میں 1 کروڑ 43 لاکھ 40 ہزار 916 طلبہ، 9 لاکھ 41 ہزار 515 اساتذہ اور 1 لاکھ 50 ہزار 854 والدین شامل ہیں۔ یہ پروگرام نہ صرف طلبہ بلکہ اساتذہ اور والدین کو بھی امتحانی دباؤ اور ذہنی تناؤ سے نمٹنے میں مدد فراہم کرتا ہے۔
نویں ایڈیشن میں داخل ہوا ’پریکشا پہ چرچا‘
وزیراعظم مودی کا یہ مقبول مکالمہ پروگرام ’پریکشا پہ چرچا (پی پی سی)‘ اپنے نویں ایڈیشن میں داخل ہو چکا ہے، جو جنوری 2026 میں منعقد ہوگا۔ اس میں بھارت سمیت دنیا کے کئی ممالک کے طلبہ، اساتذہ اور والدین شرکت کریں گے۔
آن لائن مقابلے کے ذریعے ہوگا انتخاب
شرکاء کے انتخاب کے لیے مائی گَو پورٹل پر ایک آن لائن ایم سی کیو پر مبنی مقابلہ منعقد کیا جا رہا ہے۔ کلاس 6 سے 12 تک کے طلبہ، اساتذہ اور والدین اس مقابلے میں حصہ لے سکتے ہیں اور منتخب ہونے پر وزیر اعظم سے براہِ راست بات چیت کا موقع حاصل کر سکتے ہیں۔
تمام شرکاء کو ملے گا سرٹیفکیٹ
وزارت تعلیم نے بتایا کہ اس سرگرمی میں حصہ لینے والے تمام رجسٹرڈ شرکاء کو مائی گَو کی جانب سے شراکت داری کا سرٹیفکیٹ فراہم کیا جائے گا۔ وزارت کے مطابق 11 جنوری 2026 تک آن لائن رجسٹریشن کرایا جا سکتا ہے۔ قابلِ ذکر ہے کہ ’پریکشا پہ چرچا‘ ایک سالانہ قومی پروگرام ہے، جس کے ذریعے وزیر اعظم طلبہ، اساتذہ اور والدین سے امتحان سے متعلق خوف، تیاری اور مثبت ذہنی رویے پر گفتگو کرتے ہیں تاکہ امتحان کو خوشگوار تجربہ کے طور پر دیکھا جا سکے۔
پچھلے برس ریکارڈ توڑ شرکت
گزشتہ برس پریکشا پہ چرچا 2025 میں 245 سے زائد ممالک کے طلبہ، 153 ممالک کے اساتذہ اور 149 ممالک کے والدین نے شرکت کی تھی، جس کے نتیجے میں گنیز ورلڈ ریکارڈ قائم ہوا۔ وزارت تعلیم کے مطابق 2018 میں پہلے ایڈیشن میں جہاں صرف 22 ہزار شرکاء تھے، وہیں 2025 کے آٹھویں ایڈیشن میں رجسٹریشن کی تعداد بڑھ کر 3.56 کروڑ تک پہنچ گئی، جبکہ مجموعی شرکت تقریباً 5 کروڑ رہی۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
