نئی دہلی: وزیراعظم نریندر مودی نے بدھ کے روز ملک بھر کے عوام کو مکر سنکرانتی، ماگھ بیہو اور پونگل کے پُرمسرت مواقع پر دلی مبارکباد پیش کی۔ یہ تینوں تہوار ملک کے مختلف حصوں میں فصل کی کٹائی سے جڑے ہوئے ہیں اور محنت، شکرگزاری اور خوشحالی کی علامت سمجھے جاتے ہیں۔
सभी देशवासियों को मकर संक्रांति की असीम शुभकामनाएं। तिल और गुड़ की मिठास से भरा भारतीय संस्कृति एवं परंपरा का यह दिव्य अवसर हर किसी के जीवन में प्रसन्नता, संपन्नता और सफलता लेकर आए। सूर्यदेव सबका कल्याण करें।
— Narendra Modi (@narendramodi) January 14, 2026
وزیراعظم مودی نے شہریوں کے نام اپنے پیغام میں کہا کہ یہ تہوار امید، مثبت سوچ اور نئے آغاز کی علامت ہیں۔ انہوں نے کہا کہ سنکرانتی پورے بھارت میں مختلف ناموں اور انداز میں منائی جاتی ہے، مگر اس کا جذبہ اور جوش ایک جیسا ہوتا ہے۔ یہ تہوار کسانوں کے لیے خاص اہمیت رکھتا ہے، کیونکہ اسی موقع پر قوم ان لوگوں کا شکریہ ادا کرتی ہے جو اپنی محنت سے ملک کی غذائی ضروریات پوری کرتے ہیں۔
ماگھ بیہو کے موقع پر نیک تمناؤں کا اظہار کرتے ہوئے وزیراعظم مودی نے کہا کہ یہ تہوار آسام کی ثقافت کا خوبصورت عکاس ہے اور خوشی، گرمجوشی اور بھائی چارے کا پیغام دیتا ہے۔ انہوں نے کہا کہ ماگھ بیہو فصل کی کٹائی کے اختتام کی علامت ہے اور لوگوں میں شکرگزاری اور قناعت کا جذبہ پیدا کرتا ہے۔ وزیراعظم نے کسانوں کے تعاون کو سراہتے ہوئے سبھی کے لیے امن، اچھی صحت اور کامیابی کی دعا کی۔
پونگل کے موقع پر وزیراعظم مودی نے لوگوں کو “ونکم” کہہ کر مبارکباد دی اور کہا کہ یہ تہوار انسان اور قدرت کے درمیان گہرے رشتے کو اجاگر کرتا ہے۔ ان کے مطابق پونگل زراعت، دیہی زندگی اور محنت کی عزت کا جشن ہے، جو خاندانوں کو قریب لاتا ہے اور سماجی رشتوں کو مضبوط کرتا ہے۔انہوں نے پونگل کو تمل ثقافت کی دولت کی علامت قرار دیتے ہوئے کہا کہ بھارت کو اس بات پر فخر ہے کہ تمل زبان، جو دنیا کی قدیم ترین زبانوں میں سے ایک ہے، اسی سرزمین کی وراثت ہے۔
قابلِ ذکر ہے کہ ماگھ بیہو آسام کا ایک اہم فصل کٹائی کا تہوار ہے، جو ماگھ کے مہینے میں فصل مکمل ہونے پر منایا جاتا ہے اور اس موقع پر اجتماعی دعوتوں کا اہتمام کیا جاتا ہے۔ لوہڑی، پونگل، سنکرانتی اور اتراین کے ساتھ یہ تہوار بھارت کے مختلف خطوں میں فصل کی خوشی منانے کے متنوع انداز کو ظاہر کرتے ہیں۔
خصوصی طور پر شمالی بھارت میں لوہڑی کی تقریبات الاؤ، روایتی کھانوں اور لوک گیتوں کے ساتھ منائی جاتی ہیں، جو سردیوں کے موسم میں خوشی اور گرمجوشی کا اضافہ کرتی ہیں۔
قابل ذکر بات یہ ہےکہ وزیراعظم نریندر مودی آج قومی دارالحکومت دہلی میں مرکزی وزیر ایل مرگن کی رہائش گاہ پر منعقد ہونے والی پونگل کی تقریبات میں بھی شرکت کریں گے۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
