PM Narendra Modi Assam Visit: وزیر اعظم مودی نے آسام کو کامکھیا کوریڈور سمیت 11000 کروڑ روپے کے پروجیکٹوں کا دیا تحفہ

PM Narendra Modi Assam Visit: وزیر اعظم نریندر مودی نے اتوار کو آسام میں تقریباً 11,000 کروڑ روپے کے ترقیاتی منصوبوں کا افتتاح اور سنگ بنیاد رکھا۔ اس موقع پر وزیر اعظم مودی نے کہا کہ آج ایک بار پھر ماں کامکھیا کے آشیرواد سے مجھے آسام کی ترقی سے متعلق پروجیکٹوں کو آپ کے حوالے کرنے کا شرف حاصل ہوا ہے۔ کچھ دیر پہلے یہاں 11 ہزار کروڑ روپے کے منصوبوں کا سنگ بنیاد رکھا گیا اور افتتاح کیا گیا۔ یہ تمام منصوبے آسام اور شمال مشرق کے ساتھ ساتھ جنوبی ایشیا کے دیگر ممالک کے ساتھ اس خطے کے رابطے کو مزید مضبوط کریں گے۔ آپ کو بتاتے چلیں کہ اس میں ریاست اور مرکز کے کئی منصوبے ہیں۔ ان میں کامکھیا مندر کوریڈور (498 کروڑ روپے)، گوہاٹی میں نئے ہوائی اڈے کے ٹرمینل سے چھ لین والی سڑک (358 کروڑ روپے)، نہرو اسٹیڈیم کو فیفا کے معیارات پر اپ گریڈ کرنا (831 کروڑ روپے) اور چندر پور میں ایک نیا اسپورٹس کمپلیکس  (300 کروڑ روپے) شامل ہیں۔

کامکھیا دیویہ لوک پروجیکٹ کا رکھا سنگ بنیاد

گوہاٹی میں ایک جلسہ عام سے خطاب کرتے ہوئے پی ایم مودی نے کہا، “میں کل شام یہاں آیا تھا، جس طرح گوہاٹی کے لوگوں نے سڑکوں پر آکر ہمارا استقبال کیا اور عزت افزائی کی، ہر کوئی ہمیں آشیرواد دے رہا تھا۔ میں آپ سب کا دل کی گہرائیوں سے شکریہ ادا کرتا ہوں۔ میں نے ٹی وی پر دیکھا کہ آپ لوگوں نے لاکھوں چراغ جلائے ہیں، آپ کا یہ پیار اور محبت میرے لیے بہت بڑا خزانہ ہے۔ ایودھیا میں عظیم الشان تقریب کے بعد اب میں یہاں ماں کامکھیا کے دروازے پر آیا ہوں۔ آج مجھے یہاں ماں کامکھیا دیویہ لوک پروجیکٹ کا سنگ بنیاد رکھنے کا شرف حاصل ہوا۔ اس دیویہ لوک کا نظارہ مجھے تفصیل سے بتایا گیا ہے۔ جب یہ مکمل ہو جائے گا، تو یہ ملک اور دنیا بھر سے دیوی کے عقیدت مندوں کو بے پناہ خوشی سے بھر دے گا۔”

یہ بھی پڑھیں- Delhi MLA Horse Trading Case: دہلی پولیس کی کارروائی، ایم ایل اے ہارس ٹریڈنگ معاملے میں نوٹس دینے آتشی کے گھر پہنچی کرائم برانچ کی ٹیم

ہم نے ریکارڈ وقت میں آئی آئی ٹی اور آئی آئی ایم بنائے

ایودھیا میں رام مندر کا ذکر کرتے ہوئے پی ایم مودی نے کہا، “ہماری یاترا، ہمارے مندر، ہمارے عقیدے کے مقامات، یہ صرف دیکھنے کے لیے جگہیں نہیں ہیں، یہ ہماری تہذیب کے ہزاروں سال کے سفر کی انمٹ نشانیاں ہیں۔ اس بات کی گواہی کہ وہ کس طرح ہر بحران میں ڈٹے رہے۔کوئی بھی ملک اپنے ماضی کو مٹا کر اور بھلا کر کبھی ترقی نہیں کر سکتا۔میں مطمئن ہوں کہ گزشتہ 10سالوں میں ہندوستان کے حالات بدل گئے ہیں۔بی جے پی نے ہندوستان کی ڈبل انجن والی حکومت بنا دی ہے۔ ‘ترقی اور ورثہ’ اس کی پالیسی کا حصہ ہے۔ آسام میں بی جے پی کی حکومت سے پہلے صرف 6 میڈیکل کالج تھے جب کہ آج 12 میڈیکل کالج ہیں۔ آسام آج شمال مشرق میں کینسر کے علاج کا ایک بڑا مرکز ہے۔ ہم نے ریکارڈ وقت میں آئی آئی ٹی اور آئی آئی ایم بنائے ہیں۔

-بھارت ایکسپریس