FANS National Conference in Delhi: راشٹریہ سُرکشا منچ کے دو روزہ قومی کانفرنس کا دہلی میں افتتاح، اندریش کمار نے کہا بھارت 2047 تک بن جائے گا ترقی یافتہ ملک

بھارت جو کبھی ایک خوش حال اور ترقی یافتہ ملک تھا، وہ 2047 تک اپنی کھوئی ہوئی عظمت دوبارہ حاصل کرکے دنیا کا سب سے مضبوط اور خوش حال ملک بن جائے گا۔ ان خیالات کا اظہار راشٹریہ سویم سیوک سنگھ (آر ایس ایس) کے سینئر قومی عاملہ کے رکن اور راشڑیہ سُرکشا جاگرن منچ کے سرپرست ڈاکٹر اندریش کمار نے ایک اہم تقریب میں کیا۔ یہ دو روزہ کانفرنس ’’منتھن 2047‘‘ کے عنوان سے راشڑیہ سُرکشا جاگرن منچ ، آئی سی ایس ایس آر اور دہلی یونیورسٹی کے سینٹر فار ہمالین اسٹڈیز کے اشتراک سے منعقد کی گئی ہے۔

دہلی یونیورسٹی کے نارتھ کیمپس میں منعقدہ اس قومی کانفرنس کے افتتاحی اجلاس سے خطاب کرتے ہوئے ڈاکٹر اندریش کمار نے زور دیا کہ بھارت کی ترقی صرف حکومت یا تنظیموں کی ذمہ داری نہیں بلکہ اس میں ہر شہری کی شرکت ضروری ہے۔ انھوں نے کہا کہ بھارت جلد ہی ’’بھارت سنگھ‘‘ بنے گا—ایک ایسا ملک جو خوف، جرائم، بدعنوانی اور فسادات سے پاک ہوگا اور پوری دنیا میں محبت کا پیغام عام کرے گا۔

ثقافت اور قومی شعور کی اہمیت

ڈاکٹر اندریش کمار نے کہا کہ بھارتی ثقافت میں مہمانوں کو دیوتا سمجھا جاتا ہے، جو دنیا کے کسی اور فلسفے میں نہیں ملتا۔ ہندوستان میں کھانے کو ’’پرشاد‘‘ کے طور پر اپنانا دنیا کے لیے ایک پیغام ہے کہ کھانے کو ضائع نہیں کیا جاتا بلکہ اسے نعمت سمجھ کر استعمال کیا جاتا ہے۔ اگر دنیا بھارت کے اس نظریے کو اپنا لے تو عالمی سطح پر بھوک کا خاتمہ ممکن ہو سکتا ہے۔

ڈاکٹر کمار نے کہا کہ ہمیں وزن بڑھانے کے بجائے وجود کو مضبوط بنانے کی ضرورت ہے۔ انھوں نے مزید کہا کہ بھارتی تعلیمی نظام ہمیشہ اعلیٰ رہا ہے، جہاں تکشاشیلا اور وکرماشیلا جیسے قدیم تعلیمی مراکز میں دنیا بھر کے طلباء تعلیم حاصل کرنے آتے تھے، اسی لیے بھارت کو ’’وشوگرو‘‘ (عالمی رہنما) کہا جاتا تھا۔

میڈیا اور سماجی بیداری کا کردار

اس تقریب میں مہمان خصوصی کے طور پر شریک ہونے والے سینئر صحافی جے دیپ کارنک نے کہا کہ الفاظ کا معاشرے پر گہرا اثر پڑتا ہے۔ انھوں نے خبردار کیا کہ اگر الفاظ بے راہ روی کا شکار ہو جائیں تو معاشرہ بھی گمراہ ہو جاتا ہے۔ انھوں نے کہا ’’ہم اس وقت ’اطلاعاتی جنگ‘ (Information War) کے دور میں ہیں، جہاں غلط معلومات کو ہتھیار کے طور پر استعمال کیا جا رہا ہے۔ نوجوانوں کو اس خطرے کو سمجھنا ہوگا اور باخبر رہنا ہوگا۔ ‘منتھن 2025’ جیسے پروگرام روشنی پھیلائیں گے اور قومی شعور کو بیدار کریں گے۔‘‘

قومی یکجہتی اور ترقی کا پیغام

سابق وائس چانسلر پروفیسر رادھے شیام شرما نے اس موقع پر کہا کہ ملک کی ترقی کے لیے یکجہتی ضروری ہے اور انسانی فلاح و بہبود کے جذبے کو بیدار کرنا ہوگا۔ خصوصی مہمان جنرل سریش بھٹاچاریہ نے زور دیا کہ بھارت کی خوش حالی کے لیے نوجوانوں کو آگے آنا ہوگا، کیون کہ ایک ترقی یافتہ بھارت کا خواب اب حقیقت کے قریب ہے۔

وہیں فینز (FANS) کے قومی ایگزیکٹیو صدر سردار جسپریت سنگھ نے بھارت کی ثقافتی وراثت کو اس کی سب سے بڑی طاقت قرار دیا۔ انھوں نے کہا کہ بھارتی روایات، فلسفہ اور علمی نظام عالمی سطح پر بھارت کی منفرد شناخت قائم کر سکتے ہیں۔ قومی سلامتی جاگرن منچ کے وکرمادتیہ سنگھ نے کہا کہ اس کانفرنس میں ماہرین قومی اور بین الاقوامی مسائل پر تبادلۂ خیال کریں گے تاکہ بھارت کو ایک مضبوط اور محفوظ ملک بنایا جا سکے۔

کانفرنس کا مرکزی موضوع اور معزز شرکاء

اس سال کی کانفرنس کا موضوع ہے: ’’ترقی یافتہ بھارت – دیویہ بھارت @2047: قومی سلامتی، استعداد سازی اور ثقافتی سفارت کاری‘‘۔ کانفرنس کے افتتاحی اجلاس میں دہلی یونیورسٹی، جواہر لال نہرو یونیورسٹی (جے این یو)، جامعہ ملیہ اسلامیہ اور اندرا گاندھی نیشنل اوپن یونیورسٹی (IGNOU) کے اساتذہ اور طلباء کی بڑی تعداد موجود تھی۔ ساتھ ہی متعد نمایاں شخصیات بھی موجود تھیں، جن میں گولوک بہاری رائے، پروفیسر مجاہد بیگ، پروفیسر سروج کمار مہانندا، ڈاکٹر منیش کرم وار، پروفیسر ریکھا سکسینہ، ارون کمار، وریندر کمار چودھری، راجیو کمار رنجن، متھیلیش جھا، شیلش وتس، گیتا راوتیلا، ڈاکٹر وویک سنگھ، ڈاکٹر راجیو رنجن، ڈاکٹر امت سنگھ، ڈاکٹر اندرپریت کور، ڈاکٹر یشسوی سنگھ، ڈاکٹر پوجا، چھتر سنگھ، مینک شیکھر، ہدونگرا نرزاری، ڈاکٹر شوانی رائے، ڈاکٹر دیپک پال، ڈاکٹر گورو شرما، اور سورج دیو شامل ہیں۔

بھارت ایکسپریس اردو