مرکزی وزیر داخلہ امت شاہ کی دور اندیش سوچ اور ’ایک بھارت، شریشٹھ بھارت‘ کے عزم کا اثر اب عالمی سفارت کاری کے اہم ترین پلیٹ فارم اقوام متحدہ میں بھی نظر آ رہا ہے۔ ہندوستانی حکومت کی جانب سے اقوام متحدہ کے عالمی شعبۂ مواصلات کو دی جانے والی رضاکارانہ مالی اور پالیسی معاونت کے ذریعے اقوام متحدہ میں ہندی زبان کی غیر سرکاری حیثیت کو برقرار رکھنے کی کوششیں جاری ہیں۔
اقوام متحدہ کے صدر دفتر میں منعقدہ ہندی دیوس تقریب کے دوران اقوام متحدہ میں ہندوستان کے مستقل نمائندے پی ہریش نے مرکزی وزیر داخلہ امت شاہ کی لسانی پالیسی اور ان کے نظریات کی تعریف کی۔
’زبان تقسیم نہیں کرتی، لوگوں کو جوڑتی ہے‘
مستقل نمائندے پی ہریش نے اپنے خطاب میں وزیر داخلہ امت شاہ کے خیالات کا حوالہ دیتے ہوئے کہا کہ ان کا ماننا ہے کہ زبان اس وقت سب سے زیادہ بامعنی ہوتی ہے جب وہ لوگوں اور ان کی ثقافتوں کو تقسیم کرنے کے بجائے ایک دوسرے سے جوڑتی ہے۔انہوں نے کہا کہ امت شاہ ملک کے شہریوں کو اپنی مادری زبان کے ساتھ ایک اور ہندوستانی زبان سیکھنے کی بھی مسلسل ترغیب دیتے رہے ہیں۔ یہ کوشش ’ایک بھارت، شریشٹھ بھارت‘ کے جذبے کو عملی شکل دینے میں اہم کردار ادا کرتی ہے۔
پی ہریش کے مطابق، اس جامع نظریے کے تحت ہندی عالمی سطح پر ہندوستان کے خیالات، تاریخی داستانوں اور مالا مال ثقافتی ورثے کو دنیا تک پہنچانے کا ایک اہم ذریعہ بن کر ابھری ہے۔ ہندی دنیا میں سب سے زیادہ بولی جانے والی زبانوں میں تیسرے مقام پر ہے۔ ہندوستانی سنیما، ادب، ڈیجیٹل پلیٹ فارم اور بیرون ملک مقیم ہندوستانیوں کے ذریعے اس کی رسائی مختلف براعظموں تک پھیل چکی ہے۔
اقوام متحدہ کی قرارداد میں ہندی کو خصوصی اہمیت
حال ہی میں اقوام متحدہ کی جنرل اسمبلی نے اندورا کی مشترکہ سرپرستی میں کثیر لسانیت سے متعلق ایک قرارداد منظور کی، جس میں غیر سرکاری زبانوں کی ثقافتی، سیاسی اور سفارتی اہمیت کو تسلیم کیا گیا ہے۔
قرارداد میں اس بات کی توثیق کی گئی ہے کہ اقوام متحدہ کے کام میں مؤثر شرکت کے لیے کوئی بھی نمائندہ ان زبانوں میں اپنا بیان دے سکتا ہے۔
ہندوستان کی جانب سے ’ہندی ایٹ یو این‘ منصوبے کے لیے مسلسل رضاکارانہ تعاون فراہم کیا جا رہا ہے۔ اس کے ذریعے اقوام متحدہ کی خبریں اور سوشل میڈیا بلیٹن دنیا بھر میں ہندی بولنے اور سمجھنے والے کروڑوں لوگوں تک باقاعدگی سے پہنچائے جا رہے ہیں۔
عالمی پلیٹ فارم پر ہندوستان کی کثیر لسانی ثقافت کی تعریف
تقریب میں شریک بی جے پی کے رکن پارلیمنٹ سی پی جوشی نے بھی اس سمت میں مرکزی حکومت کی کوششوں کی تعریف کی۔ انہوں نے بتایا کہ ہندوستانی حکومت اور اقوام متحدہ کے عالمی شعبۂ مواصلات کے درمیان 2018 میں ہندی زبان میں خبروں کی نشریات کے سلسلے میں ایک مفاہمت نامے پر دستخط کیے گئے تھے۔ ہندوستان کی کوششوں سے گزشتہ سال اس معاہدے کی مدت میں مزید پانچ برس کی توسیع کی گئی۔ سی پی جوشی نے اس بات پر زور دیا کہ ہندوستان ایک کثیر لسانی اور کثیر ثقافتی تہذیب ہے، جہاں تمام زبانیں اور بولیاں مشترکہ ورثے کا حصہ ہیں۔ اس موقع پر اندورا کے مستقل نمائندے جون فورنر روویرا نے بھی کہا کہ اقوام متحدہ کے منشور کے تحت بین الاقوامی تعاون اور انسانی حقوق کے فروغ کے لیے زبان سفارت کاری کا ایک مؤثر ذریعہ ہے۔تقریب میں پیش کیے گئے خیالات کے مطابق، ہندی کو عالمی سطح پر فروغ دینے کی کوششیں مختلف ثقافتوں کے درمیان رابطے اور ہم آہنگی کو مضبوط بنانے میں اہم کردار ادا کر رہی ہیں۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
