Heavy rains in North India: شمالی ہند میں موسلا دھار بارش کا قہر– دہلی، یوپی، بہار، ہماچل سمیت کئی ریاستوں میں الرٹ جاری

نئی دہلی–  شمالی اور مشرقی ہندوستان میں مانسون نے شدید تباہی مچانا شروع کر دی ہے۔ محکمہ موسمیات نے دہلی-این سی آر، اتر پردیش، ہریانہ، ہماچل پردیش اور دیگر کئی ریاستوں میں شدید بارش، آندھی اور بجلی گرنے کی وارننگ جاری کی ہے۔

دہلی اور شمالی ریاستوں میں بارش اور آندھی کا امکان

دہلی میں آج آندھی، گرج چمک اور تیز بارش متوقع ہے۔ محکمہ موسمیات نے اتر پردیش، مدھیہ پردیش، مغربی بنگال، بہار، جھارکھنڈ، پنجاب، شمالی راجستھان اور کیرالہ سمیت کئی ریاستوں میں ہلکی سے درمیانی بارش کی پیش گوئی کی ہے۔ اتر پردیش کے مغربی اضلاع میں اگلے دو دن شدید بارش کے خدشے کے پیش نظر سیلاب اور آبی جماؤ کی وارننگ بھی دی گئی ہے۔

بہار اور جھارکھنڈ: ندیاں ابل پڑیں، پل اور سڑکیں متاثر

بہار اور جھارکھنڈ میں لگاتار بارش سے ندیاں بھر گئی ہیں۔ فلگو، مہانے، نرنجنا جیسی ندیاں خطرے کے نشان سے اوپر بہہ رہی ہیں۔ گیا ضلع میں 4 افراد سیلابی ریلے میں بہہ گئے، جن میں سے 2 کی لاشیں مل چکی ہیں۔ سڑکیں ٹوٹنے اور پشتوں پر دباؤ کی خبریں بھی موصول ہوئی ہیں۔

ہماچل پردیش میں قہر: ایک مہینے میں 100 سے زائد اموات

ہماچل پردیش میں لینڈ سلائیڈ، آسمانی بجلی اور بارش کے سبب گزشتہ ایک مہینے میں 106 افراد کی ہلاکت ہو چکی ہے۔ ریاستی ڈیزاسٹر مینجمنٹ اتھارٹی کے مطابق 300 سے زائد مکانات تباہ ہو چکے ہیں جبکہ زرعی زمین اور املاک کو شدید نقصان پہنچا ہے۔

راجستھان، جئے پور اور جودھپور میں ریل خدمات متاثر

راجستھان میں بھی بھاری بارش کی وجہ سے آبی جماؤ نے زندگی درہم برہم کر دی ہے۔ جئے پور، چرو، بیکانیر، شری گنگا نگر سمیت کئی اضلاع میں سڑکیں زیر آب آ گئیں۔ جئے پور اور جودھپور میں ریلوے ٹریک پانی میں ڈوب جانے سے ٹرین خدمات متاثر ہو گئی ہیں۔

ریاستی حکومتیں متحرک، عوام سے احتیاط کی اپیل

محکمہ موسمیات کے مطابق اگلے چند دنوں میں بارش کا سلسلہ جاری رہے گا۔ متاثرہ ریاستوں کی حکومتوں نے راحتی اقدامات شروع کر دیے ہیں اور عوام سے محفوظ مقامات پر منتقل ہونے کی اپیل کی گئی ہے۔ مانسون کے موجودہ مرحلے میں شمالی اور مشرقی بھارت کو شدید موسمی چیلنجز کا سامنا ہے۔ عوام کو محتاط رہنے، غیر ضروری سفر سے گریز کرنے اور سرکاری ہدایات پر عمل کرنے کی سخت تاکید کی گئی ہے۔

بھارت ایکسپریس اردو۔