دہلی کے لیے نئے پولیس کمشنر کی تقرری کو لے کر وزارت داخلہ میں غور وفکر میں تیزی آ گئی ہے اور جولائی کے وسط تک اس پر فیصلہ آنے کی امید ہے۔ واضح رہے کہ گزشتہ برسوں میں نیم فوجی پس منظر والے افسران کو دہلی پولیس کمشنر کے عہدے کے لیے موقع ملا تھا، لیکن اس بار وزارت داخلہ یو ٹی کیڈر کے تجربہ کار آئی پی ایس افسران پر بھروسہ کر سکتی ہے۔
اطلاعات کے مطابق تین افسران ستیش گولچہ، پراویر رنجن اور وریندر سنگھ چہل میں سے کوئی بھی جلد ہی دہلی پولیس کا نیا کمشنر بن سکتا ہے۔ موجودہ پولیس کمشنر سنجے اروڑہ 31 جولائی 2025 کو ریٹائر ہو رہے ہیں۔ ایسے میں وزارت داخلہ اور محکمہ پولیس میں اعلیٰ سطح پر ان کے جانشین کے نام پر بات چیت شروع ہو گئی ہے۔ ذرائع کے مطابق اس بار دہلی پولیس کی کمان دوبارہ یو ٹی کیڈر کے کسی افسر کو سونپے جانے کا قوی امکان ہے۔
اس دوڑ میں تین نام سب سے آگے
وزارت داخلہ کی سطح پر تین سینئر آئی پی ایس افسران کے ناموں پر سنجیدگی سے غور کیا جا رہا ہے:
1. ستیش گولچہ: یہ فی الحال دہلی پولیس کے اسپیشل کمشنر (انٹیلی جنس) ہیں۔ ان کے پاس وی آئی پی سیکیورٹی، انٹیلی جنس، لاء اینڈ آرڈر اور اکنامک آفینس ونگ جیسے اہم محکموں کا تجربہ ہے۔ وہ اپنی انتظامی کارکردگی اور پرسکون قیادت کی صلاحیت کے لیے جانے جاتے ہیں۔
2. پراویر رنجن: یہ دہلی پولیس میں اسپیشل کمشنر (کرائم) رہ چکے ہیں اور کسانوں کی تحریک (2020-21) کے دوران انھوں نے اہم کردار ادا کیا۔ اس کے علاوہ این آئی اے کے ڈی جی بھی رہ چکے ہیں اور فی الحال ایک مرکزی سیکورٹی ایجنسی میں تعینات ہیں۔ ان کی شبیہ ایک سخت لیکن عدالتی اور اسٹریٹجک سوچ رکھنے والے افسر کی ہے۔
3. وریندر سنگھ چہل: یہ اس وقت دہلی پولیس میں خصوصی کمشنر کے طور پر کام کر رہے ہیں۔ اس سے قبل فنانشل انٹیلی جنس یونٹ، سی بی آئی اور انٹیلی جنس بیورو جیسے اہم اداروں میں کام کر چکے ہیں۔ ان کا انتظامی تجربہ اور امن و امان پر گرفت انھیں اس دوڑ میں مضبوط امیدوار بناتی ہے۔
کیا کہتے ہیں ذرائع؟
ذرائع کا ماننا ہے کہ وزارت داخلہ کو ایسا افسر چاہیے جس کی امیج صاف ہو اور جو امن و امان کے ساتھ ساتھ سیاسی توازن بھی برقرار رکھ سکے۔ دہلی جیسے حساس اور چیلنجنگ شہر میں پولیس کمشنر کا کردار نہ صرف انتظامی ہے بلکہ اسٹریٹجک بھی ہے۔ اس وقت ستیش گولچہ، پراویر رنجن اور وریندر سنگھ چاہل کے ناموں پر اعلیٰ سطح پر سنجیدگی سے غور کیا جا رہا ہے۔ اب دیکھنا یہ ہے کہ ان میں سے کس کو دارالحکومت کی پولیس کی کمان سونپی جاتی ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
