The Family Man 3 : منوج باجپئی کی ‘دی فیملی مین 3’ کو لے کر بڑا اپ ڈیٹ، اس دن ریلیز ہوگی اسپائی تھرلر سیریز

ممبئی: پرائم ویڈیو کی مقبول ترین اسپائی تھرلر سیریز ‘دی فیملی مین’ کے تیسرے حصے کا شائقین طویل عرصے سے انتظار کر رہے تھے۔ آخرکار اس انتظار کا خاتمہ ہو گیا ہے۔ منگل کے روز میکرز نے ‘دی فیملی مین 3’ کی ریلیز ڈیٹ کا باضابطہ اعلان کر دیا ہے۔

21 نومبر کو ہوگی ریلیز
پروڈیوسرز نے ایک پرومو ویڈیو جاری کرتے ہوئے بتایا کہ سیریز 21 نومبر کو ریلیز کی جائے گی۔ پرومو میں پریامنی کا کردار نظر آتا ہے جو بتاتی ہیں کہ پچھلے پانچ سالوں میں بہت کچھ بدل گیا ہے۔ان کی بیٹی اب کالج جا رہی ہے، مگر شری کانت تیواری (منوج باجپئی) اب بھی اپنی پرانی دنیا میں اٹکے ہوئے ہیں۔ ویڈیو کے آخر میں بتایا جاتا ہے کہ “شری کانت تیواری واپس آ رہا ہے” اور پھر پارٹ-3 کی ریلیز ڈیٹ سامنے آتی ہے۔

شائقین کے انتظار کا اختتام
‘دی فیملی مین 3’ کو راج اینڈ ڈی کے نے اپنے بینر ڈی 2 آر فلمز کے تحت تیار کیا ہے۔ یہ ایک ایکشن، اسپائی اور تھرلر کہانی ہے جس کا انتظار مداحوں کو پچھلے کئی برسوں سے تھا۔ اس بار بھی منوج باجپئی ایک انڈر کور ایجنٹ شری کانت تیواری کے کردار میں واپسی کر رہے ہیں۔ ایک ایسا شخص جو بیک وقت اپنے خاندان کی ذمہ داریاں نبھاتا ہے اور ملک کی خدمت بھی کرتا ہے۔

تخلیقی ٹیم اور اسٹار کاسٹ
سیریز کو راج، ڈی کے اور سمن کمار نے مل کر لکھا ہے جبکہ سُمت اروڑا نے اس کے ڈائیلاگ تحریر کیے ہیں۔ تیسرے حصے میں جے دیپ اہلاوت، نمرَت کور، شارِب ہاشمی، پریامنی، اشلیشا ٹھاکر، ویدانت سنہا، شرِیا دھنونتری اور گُل پناگ جیسے اداکار شامل ہیں۔

ڈائریکٹرز کا کہنا ہے — “انتظار بے کار نہیں جائے گا”
راج اور ڈی کے نے اپنے بیان میں کہا کہ ”گزشتہ برسوں میں ‘دی فیملی مین’ کو ناظرین نے جو محبت دی ہے، وہ ناقابلِ یقین ہے۔ ہم جانتے ہیں کہ مداح صبر کے ساتھ انتظار کر رہے تھے، اور ہم نے کوشش کی ہے کہ یہ انتظار بالکل بے کار نہ جائے۔ اس سیزن میں ناظرین کو مزید زبردست ایکشن، دلچسپ کہانی اور طاقتور پرفارمنس دیکھنے کو ملے گی“۔

نیا خطرہ، نیا چیلنج
انہوں نے مزید کہا کہ ”اس سیزن میں شکاری خود شکار بن جاتا ہے۔ شری کانت تیواری (منوج باجپئی) کو رُکما ( جے دیپ اہلاوت) کے روپ میں ایک ایسے خطرے کا سامنا ہے جو اس نے پہلے کبھی نہیں دیکھا۔ یہ خطرہ نہ صرف اس کے کیریئر بلکہ اس کے خاندان کو بھی متاثر کر سکتا ہے۔ ہمیں پورا یقین ہے کہ 21 نومبر کو دنیا بھر کے شائقین پچھلے دونوں سیزن کی طرح، بلکہ شاید اس سے بھی زیادہ، اس نئے سیزن کو پسند کریں گے“۔ منوج باجپئی کے مداحوں کے لیے یہ خبر کسی تحفے سے کم نہیں — کیونکہ ایک بار پھر ‘دی فیملی مین’ اپنے نئے روپ اور مزید سنسنی خیز کہانی کے ساتھ اسکرین پر واپسی کرنے جا رہی ہے۔

بھارت ایکسپریس اردو