آریہ ببر نے ایک انٹرویو میں کہا تھا کہ وہ اپنے والد کی طرح طویل اور مضبوط کیریئر بنانا چاہتے تھے، لیکن بالی ووڈ میں انہیں وہ کامیابی حاصل نہ ہو سکی۔ تاہم آریہ نے ہمت نہیں ہاری اور فلموں، ٹی وی، تھیٹر، پنجابی سنیما اور لکھنے جیسے مختلف شعبوں میں خود کو ثابت کرنے کی کوشش جاری رکھی۔آریہ ببر کی پیدائش 24 مئی 1981 کو ممبئی میں ہوئی۔ ان کا بچپن مکمل طور پر فلمی ماحول میں گزرا۔ ان کے والد راج ببر ہندی سنیما کے معروف اداکار رہے ہیں، جبکہ ان کی والدہ نادرا ببر تھیٹر کی مشہور فنکارہ ہیں۔ گھر میں فن اور اداکاری کا ماحول ہونے کی وجہ سے آریہ کا رجحان بھی بچپن سے اداکاری کی طرف ہو گیا۔ ان کی بڑی بہن جوہی ببر بھی اداکارہ ہیں، جبکہ ان کے سوتیلے بھائی پرتیک ببر بھی بالی ووڈ اداکار ہیں۔
فلم ‘اب کے برس’ سے کیا کیریئر کا آغاز
آریہ ببر نے اپنے بالی ووڈ کیریئر کا آغاز سال 2002 میں فلم ‘اب کے برس’ سے کیا، جس میں ان کے ساتھ امرتا راؤ نظر آئی تھیں۔ تاہم یہ فلم باکس آفس پر کامیاب ثابت نہ ہو سکی۔ پہلی فلم فلاپ ہونے کے باوجود انہیں مسلسل کام ملتا رہا۔ انہوں نے کئی فلموں میں مرکزی اور معاون کردار ادا کیے، لیکن ان کا کیریئر اس رفتار سے آگے نہیں بڑھ سکا جس کی امید کی جا رہی تھی۔بعد میں آریہ ببر ’گرو‘, ’ریڈی‘ اور ’مٹرو کی بجلی کا منڈولا‘ جیسی فلموں میں بھی دکھائی دیے۔ انہوں نے بڑے ستاروں کے ساتھ کام کیا، لیکن اس کے باوجود فلم انڈسٹری میں مضبوط شناخت بنانے میں کامیاب نہ ہو سکے۔ آہستہ آہستہ بالی ووڈ میں ان کا سفر کمزور پڑنے لگا۔
پنجابی فلم انڈسٹری کا رخ
اس کے بعد آریہ ببر نے پنجابی فلم انڈسٹری کا رخ کیا، جہاں انہیں اچھی خاصی پہچان ملی۔ ان کی فلم ’یار انمولے‘ کو ناظرین نے کافی پسند کیا اور پنجابی فلموں میں ان کی اداکاری کو سراہا گیا۔فلموں کے علاوہ آریہ نے ٹی وی کی دنیا میں بھی کام کیا۔ وہ ’بگ باس 8‘ کا حصہ بنے، جہاں ان کا الگ انداز دیکھنے کو ملا۔ اگرچہ وہ شو میں زیادہ آگے نہیں جا سکے، لیکن کئی تنازعات کی وجہ سے خبروں میں ضرور رہے۔ خاص طور پر اداکارہ منیشا لامبا کے حوالے سے دیے گئے ان کے بیانات کافی سرخیوں میں رہے، بعد میں انہیں اپنے بیان پر معافی بھی مانگنی پڑی۔انہوں نے ٹی وی شو ’سنکٹ موچن مہابلی ہنومان‘ میں راون کا کردار بھی ادا کیا، جسے ناظرین نے پسند کیا۔ آریہ ببر کو لکھنے کا بھی شوق ہے اور انہوں نے ‘پشپک ویمان’ نامی ایک کامک بک بھی لکھی ہے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
