آسٹریلیا نے شاندار کارکردگی کا مظاہرہ کرتے ہوئے دوسرے ون ڈے میچ میں زمبابوے کو 84 رنز سے شکست دے دی۔ ہرارے اسپورٹس کلب میں کھیلے گئے مقابلے میں آسٹریلیا نے پہلے بیٹنگ کرتے ہوئے 50 اوورز میں 6 وکٹوں کے نقصان پر 356 رنز بنائے، جس کے جواب میں زمبابوے کی پوری ٹیم 272 رنز پر آل آؤٹ ہوگئی۔ اس جیت کے ساتھ آسٹریلیا نے تین میچوں کی ون ڈے سیریز میں 2-0 کی ناقابل شکست برتری حاصل کرلی ہے۔
ٹریوس ہیڈ کی شاندار سنچری
ٹاس کے بعد پہلے بیٹنگ کرنے اتری آسٹریلوی ٹیم کو ٹریوس ہیڈ نے مضبوط آغاز فراہم کیا۔ ہیڈ نے 84 گیندوں پر 112 رنز کی شاندار اننگز کھیلی۔ ان کی اننگز نے آسٹریلیا کے بڑے اسکور کی بنیاد رکھی۔ کُوپر کونولی نے بھی عمدہ بیٹنگ کرتے ہوئے 69 گیندوں پر 78 رنز بنائے، جبکہ مچل مارش نے 63 گیندوں پر 53 رنز کی اہم اننگز کھیلی۔ جوش انگلس نے 21 اور ایلکس کیری نے 20 رنز کا تعاون دیا۔ اننگز کے آخری مرحلے میں اولیور پیک نے تیز رفتار بیٹنگ کا مظاہرہ کیا۔ انہوں نے صرف 18 گیندوں پر 41 رنز کی ناقابل شکست اننگز کھیلی، جس کی بدولت آسٹریلیا 356 رنز کے بڑے اسکور تک پہنچنے میں کامیاب رہا۔
زمبابوے کی جانب سے برینڈن ٹیلر اور سکندر رضا کی کوشش
357 رنز کے ہدف کا تعاقب کرنے اتری زمبابوے کی ٹیم کو برائن بینیٹ اور بین کرن نے محتاط آغاز فراہم کیا۔ دونوں نے پہلے وکٹ کے لیے 46 رنز جوڑے۔ بینیٹ نے 34 گیندوں پر 23 جبکہ کرن نے 46 گیندوں پر 30 رنز بنائے۔ انوسنٹ کیا نے 47 گیندوں پر 34 رنز بنائے، جبکہ برینڈن ٹیلر نے 40 گیندوں پر 3 چوکوں کی مدد سے 39 رنز کی اننگز کھیلی۔ کریگ ارون نے 39 گیندوں پر 38 رنز بنائے۔ کپتان سکندر رضا نے 5 چوکوں کی مدد سے 45 رنز بنائے، جبکہ بریڈ ایونز نے 12 اور ویسلی مدھویرے نے 13 گیندوں پر 26 رنز کی تیز اننگز کھیلی۔ تاہم زمبابوے کی پوری ٹیم 272 رنز پر سمٹ گئی اور اسے 84 رنز کی شکست کا سامنا کرنا پڑا۔
آسٹریلیا نے سیریز اپنے نام کی
آسٹریلیا کی جانب سے جوش ہیزل ووڈ، کُوپر کونولی اور میٹ رینشا نے دو، دو وکٹیں حاصل کیں، جبکہ نیتھن ایلس اور اولیور پیک نے ایک، ایک کھلاڑی کو آؤٹ کیا۔ زمبابوے کی جانب سے بریڈ ایونز نے 3 وکٹیں حاصل کیں، جبکہ ویلنگٹن مساکادزا نے 51 رنز دے کر 2 وکٹیں حاصل کیں۔ آسٹریلیا نے اس سے قبل پہلے ون ڈے میں بھی زمبابوے کو 59 رنز سے شکست دی تھی۔ دوسرے میچ میں کامیابی کے بعد آسٹریلیا نے تین میچوں کی سیریز میں 2-0 کی فیصلہ کن برتری حاصل کرلی ہے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
