مرکزی وزیر داخلہ و تعاون امت شاہ نے آج نیشنل انسٹی ٹیوٹ آف ڈیزاسٹر مینجمنٹ (این آئی ڈی ایم) کی گورننگ باڈی کی تیسری میٹنگ کی صدارت کی۔ میٹنگ میں وزیراعظم نریندر مودی کے ’زیرو کیژولٹی‘ وژن کا ذکر کرتے ہوئے انہوں نے کہا کہ این آئی ڈی ایم اب تحقیق، اختراع، پالیسی معاونت، تربیت اور تعاون کا قومی مرکز بن چکا ہے۔ امت شاہ نے موسمیاتی تبدیلی اور عالمی حدت سے پیدا ہونے والی آفات سے نمٹنے کے لیے ہر متعلقہ محکمے میں ایک خصوصی سیل قائم کرنے کی ہدایت دی۔ اس کا مقصد گاؤں اور شہروں کو آفات سے نمٹنے کے لیے زیادہ مضبوط بنانا ہے۔ انہوں نے کہا کہ گزشتہ 12 برسوں میں آفات سے نمٹنے کے طریقہ کار اور سوچ میں وسیع تبدیلی آئی ہے۔ اب توجہ صرف راحت اور بازآبادکاری پر نہیں بلکہ خطرات کو کم کرنے، قبل از وقت انتباہ کے نظام کو مضبوط بنانے اور صفر جانی نقصان کے ہدف پر ہے۔
این آئی ڈی ایم کو عالمی تحقیق سے فائدہ اٹھانے کی ہدایت
میٹنگ میں مرکزی داخلہ سکریٹری گووند موہن، قومی ڈیزاسٹر مینجمنٹ اتھارٹی کے ارکان، نیشنل ڈیزاسٹر رسپانس فورس کے ڈائریکٹر جنرل، محکمہ موسمیات کے ڈائریکٹر جنرل سمیت کئی سینئر افسران موجود رہے۔ امت شاہ نے این آئی ڈی ایم سے کہا کہ دنیا بھر میں ہونے والی تحقیق کا مطالعہ کیا جائے اور اس کے مفید نتائج کو بھارت کی مقامی ضروریات کے مطابق نافذ کیا جائے۔انہوں نے محکمہ زراعت کو پاکستان کی جانب سے آنے والے ٹڈی دل کے حملوں سے نمٹنے کے لیے مستقل تیاری برقرار رکھنے کی ہدایت بھی دی۔
موسمیاتی تبدیلی کے پیش نظر اداروں کا کردار اہم
این آئی ڈی ایم کے ایگزیکٹو ڈائریکٹر مدھوپ ویاس نے وزیر داخلہ کا استقبال کیا اور ادارے کی جانب سے چلائے جا رہے تربیتی اور صلاحیت سازی کے پروگراموں کی معلومات فراہم کیں۔امت شاہ نے کہا کہ آنے والے دنوں میں قومی ڈیزاسٹر مینجمنٹ اتھارٹی اور این آئی ڈی ایم کا کردار مزید اہم ہوگا، کیونکہ موسمیاتی تبدیلی کے باعث آفات کی تعداد میں اضافے کا خدشہ ہے۔ انہوں نے آفات کے خطرات کو کم کرنے، پیشگی تیاری بہتر بنانے اور اداروں کے درمیان تال میل مضبوط کرنے پر زور دیا۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
