نئی دہلی: آئی پی ایل 2026 کے فائنل میں اتوار 31 مئی کو رائل چیلنجرز بنگلورو (آر سی بی) اور گجرات ٹائٹنز (جی ٹی) آمنے سامنے ہوں گی۔ نریندر مودی اسٹیڈیم، احمد آباد میں کھیلے جانے والے اس بڑے مقابلے سے قبل شائقین کرکٹ کے ذہن میں ایک اہم سوال گردش کر رہا ہے کہ اگر بارش کے باعث فائنل مکمل نہ ہو سکا تو چیمپئن کا فیصلہ کیسے ہوگا؟ آئی پی ایل انتظامیہ نے فائنل کے لیے ریزرو ڈے مختص کر رکھا ہے۔ اگر خراب موسم یا بارش کے باعث مقررہ دن یعنی اتوار کو میچ مکمل نہیں ہو پاتا تو مقابلہ اگلے دن، پیر کو کرایا جائے گا۔ اس طرح دونوں ٹیموں کو ٹائٹل کے لیے برابر موقع فراہم کرنے کی کوشش کی جائے گی۔
تاہم اگر بارش ریزرو ڈے کو بھی کھیل میں رکاوٹ بنے اور میچ ممکن نہ ہو سکے تو پھر خصوصی قوانین نافذ ہوں گے۔ آئی پی ایل کے قواعد کے مطابق کسی بھی میچ کا باضابطہ نتیجہ حاصل کرنے کے لیے دونوں ٹیموں کا کم از کم پانچ، پانچ اوور کھیلنا ضروری ہوتا ہے۔ اگر یہ بھی ممکن نہ ہو تو میچ منسوخ تصور کیا جائے گا۔ایسی صورت میں فاتح ٹیم کا فیصلہ لیگ مرحلے کی پوائنٹس ٹیبل کی بنیاد پر کیا جاتا ہے۔ جو ٹیم لیگ مرحلے کے اختتام پر پوائنٹس ٹیبل میں سب سے اوپر ہو، اسے چیمپئن قرار دے دیا جاتا ہے۔آئی پی ایل 2026 میں رائل چیلنجرز بنگلورو نے لیگ مرحلے کا اختتام پہلی پوزیشن پر کیا تھا، جبکہ گجرات ٹائٹنز دوسرے نمبر پر رہی تھی۔ اس لیے اگر فائنل اور ریزرو ڈے دونوں پر کھیل ممکن نہ ہوا تو آر سی بی کو فاتح قرار دے کر ٹرافی سونپ دی جائے گی۔
دوسری جانب آر سی بی کی نظریں مسلسل دوسری مرتبہ آئی پی ایل ٹائٹل جیتنے پر بھی مرکوز ہیں۔ ٹیم نے گزشتہ سیزن 2025 میں کپتان رجت پاٹیدار کی قیادت میں اپنی تاریخ کا پہلا آئی پی ایل خطاب جیتا تھا۔ اب بنگلورو کی ٹیم مسلسل دوسرا ٹائٹل جیت کر تاریخ رقم کرنے کی کوشش کرے گی۔اب تک آئی پی ایل کی تاریخ میں صرف دو ٹیمیں مسلسل دو سیزن میں ٹرافی جیتنے کا کارنامہ انجام دے سکی ہیں۔ چنئی سپر کنگز نے مہندر سنگھ دھونی کی قیادت میں 2010 اور 2011 میں مسلسل دو ٹائٹل اپنے نام کیے تھے، جبکہ ممبئی انڈینز نے روہت شرما کی کپتانی میں 2019 اور 2020 میں یہ اعزاز حاصل کیا تھا۔اب دیکھنا دلچسپ ہوگا کہ آیا آر سی بی اس فہرست میں شامل ہو کر مسلسل دو آئی پی ایل ٹائٹل جیتنے والی تیسری ٹیم بنتی ہے یا گجرات ٹائٹنز بنگلورو کے خواب کو چکنا چور کرتے ہوئے ایک اور تاریخی کامیابی اپنے نام کرتی ہے۔
بھارت ایکسپریس ارد و
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
