تمل ناڈو میں آئندہ اسمبلی انتخابات کے پس منظر میں مرکزی وزیر داخلہ امت شاہ کا دو روزہ تریچی دورہ پیر کو ختم ہو گیا۔ اس دورے سے بی جے پی حلقوں میں خاصی توقعات وابستہ تھیں، مگر فی الحال کوئی بڑا سیاسی بریک تھرو سامنے نہیں آ سکا۔ این ڈی اے کو ریاست میں مضبوط کرنے کی کوششیں ضرورنظرآئیں، لیکن اتحاد کی حتمی تصویر ابھی تک واضح نہیں ہو پائی۔
اے آئی اے ڈی ایم کے پر نظریں
امت شاہ کے اس دورے کو لے کر اندازے لگائے جا رہے تھے کہ بی جے پی ممکنہ اتحادی جماعتوں کے ساتھ اتحاد کے حوالے سے ٹھوس بات چیت کرے گی۔ خاص طور پر اے آئی اے ڈی ایم کے کے اندرونی سیاسی مساوات اور اس کی اعلیٰ قیادت کے ساتھ براہ راست ملاقات پر سب کی نگاہیں مرکوز تھیں۔ قیاس کیا جا رہا تھا کہ اے آئی اے ڈی ایم کے کے جنرل سکریٹری ایڈاپڈی کے۔ پلانی سوامی (ای پی ایس) تریچی پہنچ کر امت شاہ سے ملاقات کریں گے، لیکن ایسا نہیں ہو سکا۔ بعد میں بی جے پی کے ایک عہدیدار نے واضح کیا کہ ایسی کسی ملاقات کا پہلے سے کوئی شیڈول طے نہیں تھا اور امت شاہ جن پروگراموں میں شریک ہوئے، وہ بی جے پی کے تھے، نہ کہ این ڈی اے کے مشترکہ پروگرام۔
بند کمرے میں اہم ملاقاتیں
اگرچہ امت شاہ نے اے آئی اے ڈی ایم کے کے سینئر رہنما اور تنظیمی سکریٹری ایس۔ پی۔ ویلومنی سے بند کمرے میں دو مرتبہ ملاقات ضرور کی۔ پہلی ملاقات میں تمل ناڈو کے لیے بی جے پی کے انتخابی انچارج پیوش گوئل بھی موجود تھے۔ ان ملاقاتوں کے بارے میں دونوں جماعتوں کی جانب سے سرکاری طور پر زیادہ تفصیلات نہیں بتائی گئیں، جس کے باعث سیاسی قیاس آرائیاں مزید تیز ہوگئیں۔ ذرائع کے مطابق، ویلومنی نے یہ ملاقات ای پی ایس کی ہدایت پر کی تھی۔ اتوار کی شام بھی امت شاہ اور ویلومنی کے درمیان ایک نشست ہوئی تھی، جس کے بعد پیر کو شہر کے ایک ہوٹل میں تقریباً دو گھنٹے تک تفصیلی بات چیت ہوئی۔ تاہم اس گفتگو کے ایجنڈے کے بارے میں سرکاری طور پر کوئی تصدیق نہیں کی گئی۔
مندر درشن اور پونگل کی تقریبات
سیاسی ملاقاتوں کے ساتھ ساتھ امت شاہ نے مذہبی اور ثقافتی سرگرمیوں میں بھی حصہ لیا۔ انہوں نے تریچی کے مشہور جمبوکیشورر مندر اور سری رنگم رنگناتھ سوامی مندر میں درشن کیے۔ اس کے بعد وہ تریچی–مدورئی قومی شاہراہ پر منعقد بی جے پی کے ثقافتی پروگرام ’’نمّا اُورو مودی پونگل‘‘ میں شریک ہوئے۔ پارٹی کارکنوں کو امید تھی کہ امت شاہ یہاں خطاب کریں گے، تاہم وہ آدھے گھنٹے سے بھی کم وقت میں پروگرام مقام سے روانہ ہو گئے۔
آئندہ سیاست پر نظریں مرکوز
بی جے پی کی سینئر رہنما تملسائی سُندَراجن نے ان ملاقاتوں کو معمول کا عمل قرار دیا اور کہا کہ اتحادی جماعتوں کے رہنما ایک دوسرے سے ملتے رہتے ہیں۔ انہوں نے یہ دعویٰ بھی کیا کہ آنے والے وقت میں این ڈی اے مزید مضبوط ہوگا اور 2026 کے اسمبلی انتخابات سے پہلے مزید جماعتیں اتحاد میں شامل ہو سکتی ہیں۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
