تھائی لینڈ اور کمبوڈیا تنازعہ
بنکاک: تھائی لینڈ اور کمبوڈیا کی سرحد پر کشیدگی میں مسلسل اضافہ ہو رہا ہے۔ فوجی تنازعہ میں اب تک 14 تھائی شہری ہلاک ہو چکے ہیں، جب کہ 46 دیگر زخمی ہوئے ہیں۔ تھائی لینڈ کی پبلک ہیلتھ منسٹری نے یہ اطلاع دی۔ خبر رساں ایجنسی ژنہوا کے مطابق کمبوڈیا نے جمعرات کی شام تک اپنی ہلاکتوں کے بارے میں کوئی اطلاع جاری نہیں کی تھی۔ اس دوران، بنکاک میں صحت عامہ کے وزیر سومسیک تھیپسوتین نے 13 شہریوں اور ایک فوجی سمیت 14 افراد کی ہلاکت کی تصدیق کی۔
فوری طور پر جنگی جرائم کو روکنے کی اپیل
انہوں نے شہریوں اور ایک اسپتال پر کمبوڈیا کے حملوں کی مذمت کرتے ہوئے کہا کہ ہم کمبوڈیا کی حکومت سے اپیل کرتے ہیں کہ وہ فوری طور پر ان جنگی جرائم کو روکے اور پرامن آپسی وجود کے اصولوں کا احترام کرے۔
بارودی سرنگ پھٹنے کے بعد ہوئی فوجی جھڑپ
یہ فوجی جھڑپ بدھ کے روز بارودی سرنگ کے دھماکے کے بعد ہوئی، جس میں تھائی لینڈ کے پانچ فوجی زخمی ہو گئے۔ اس واقعے کے بعد دونوں فریقوں نے سفارتی کشیدگی میں اضافہ کرتے ہوئے اپنے سفیروں کو معطل کر دیا۔ تھائی حکام نے کمبوڈیا پر روسی ساختہ نئی بارودی سرنگیں بچھانے کا الزام لگایا، جبکہ کمبوڈیا نے ان دعوؤں کو ’بے بنیاد الزامات‘ قرار دے کر مسترد کر دیا۔ کمبوڈیا نے کہا کہ یہ دھماکے پرانے تنازعات سے بچ جانے والی بارودی سرنگوں کی وجہ سے ہوئے۔
جمعرات کو سرحد پر چھ مقامات پر جھڑپیں ہوئیں
جمعرات کے روز سرحد پر تقریباً چھ مقامات پر جھڑپیں ہوئیں، جن میں قدیم تا موئن تھوم مندر بھی شامل ہے۔ تھائی لینڈ کے لڑاکا طیاروں نے جوابی فضائی حملے کیے۔ تھائی وزارت خارجہ کے ترجمان نکورنڈج بالانکورا نے کہا، ’’یہ اپنے دفاع میں کیا گیا ایک قدم تھا۔‘‘
حالانکہ، جمعرات کے روز ہونے والی جھڑپوں کے بعد صورتحال مزید بگڑ گئی۔ دونوں فریقوں نے ایک دوسرے پر بین الاقوامی قوانین کی خلاف ورزی کا الزام لگایا۔ کمبوڈیا کے وزیر اعظم ہُن مانیٹ نے اقوام متحدہ کی سلامتی کونسل پر زور دیا کہ وہ اس معاملے پر بات چیت کے لیے فوری اجلاس منعقد کرے۔ انہوں نے تنازعہ کے درمیان ایک ہنگامی اجلاس بھی بلایا، جو نیویارک میں بند کمرے میں چلا۔
کمبوڈیا نے قانونی کارروائی کا دیا انتباہ
کمبوڈیا کی وزارت دفاع نے دعویٰ کیا کہ فضائی حملوں میں یونیسکو کی عالمی ثقافتی ورثہ سائٹ پریہ ویہیر کے قریب ایک سڑک کو نشانہ بنایا گیا۔ کمبوڈیا نے قانونی کارروائی کا انتباہ دیا۔ کمبوڈیا کی وزارت ثقافت نے کہا، ’’اس مندر کو یونیسکو نے عالمی ثقافتی ورثہ قرار دیا ہے اور یہ ’کمبوڈیا کے لوگوں کا تاریخی ورثہ‘ ہے۔‘‘
’’فوجی اہداف پر ہوئے، کسی اور مقام پر نہیں۔‘‘
وزارت دفاع کے ترجمان لیفٹیننٹ جنرل مالی سوچیتا نے کہا، ’’کمبوڈیا کے پاس تھائی لینڈ کے خطرات سے اپنی سرزمین کا دفاع کرنے کے سوا کوئی چارہ نہیں تھا۔ انہوں نے کہا کہ حملے ’’فوجی اہداف پر مرکوز تھے، کسی اور مقام پر نہیں۔‘‘
جھڑپوں نے بین الاقوامی تشویش کو دیا جنم
جھڑپوں نے بین الاقوامی تشویش کو جنم دے دیا ہے۔ اقوام متحدہ کے سیکرٹری جنرل کے نائب ترجمان فرحان حق کے مطابق، اقوام متحدہ کے سیکرٹری جنرل انتونیو گوتریس نے دونوں فریقوں پر تحمل کا مظاہرہ کرنے اور کسی بھی مسئلے کو بات چیت کے ذریعے حل کرنے کی اپیل کی۔
تھائی شہریوں کو کمبوڈیا چھوڑنے کا مشورہ
تھائی لینڈ نے تمام زمینی سرحدی چوکیوں کو سیل کر دیا ہے اور اپنے شہریوں کو کمبوڈیا چھوڑنے کا مشورہ دیا ہے۔ تمام 7 تھائی ایئر لائنز نے شہریوں کو واپس لانے میں مدد کی پیشکش بھی کی ہے۔ تھائی لینڈ کے قائم مقام وزیر اعظم فومتھم ویچایاچائی صورتحال پر نظر رکھے ہوئے ہیں اور انہوں نے کمبوڈیا کو مزید کسی بھی جارحانہ اقدام کے خلاف خبردار کیا ہے۔
بھارت ایکسپریس۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
