افغانستان کی ٹیم میں راشد خان کی واپسی
نئی دہلی: افغانستان کے معروف لیگ اسپنر راشد خان کی جنوبی افریقہ کے خلاف آئندہ ون ڈے سیریز کے لیے ٹیم میں واپسی ہو رہی ہے۔ یہ سیریز 18 سے 22 ستمبر تک شارجہ میں کھیلی جائے گی۔ راشد نے آئرلینڈ کے خلاف آخری ون ڈے سیریز نہیں کھیلی اور وہ نیوزی لینڈ کے خلاف افغانستان کے واحد ٹیسٹ میچ سے بھی باہر ہیں۔ حالانکہ، گریٹر نوئیڈا میں مسلسل بارش کی وجہ سے یہ میچ چار دن تک شروع نہیں ہوسکا اور اب تک ہر روز کا کھیل منسوخ کردیا گیا ہے۔ میچ کا حتمی فیصلہ کل (جمعہ) آئے گا۔
ٹاپ آرڈر بلے باز عبدالمالک بھی ٹیم میں شامل
اسکواڈ میں افغانستان نے ٹاپ آرڈر بلے باز عبدالمالک کو شامل کیا ہے جنہوں نے حالیہ ڈومیسٹک لسٹ اے مقابلوں میں شاندار کارکردگی کا مظاہرہ کیا ہے۔ درویش رسولی جنہوں نے سات ٹی ٹوئنٹی میچز کھیلے ہیں اور حال ہی میں منعقدہ لسٹ اے کپ اور ایس سی ایل 9 ٹورنامنٹس میں مسلسل کارکردگی دکھائی ہے، انہیں بھی ٹیم میں شامل کیا گیا ہے۔
مجیب الرحمان انجری کے شکار
چیف سلیکٹر احمد شاہ سلیمان خیل نے ایک بیان میں کہا کہ مجیب الرحمان اپنی انجری سے صحت یاب ہو رہے ہیں اور وہ سلیکشن کے لیے دستیاب نہیں ہیں۔ ابراہیم زدران بھی نیوزی لینڈ ٹیسٹ سے قبل ٹخنے میں موچ آنے کی وجہ سے جنوبی افریقہ ون ڈے سے باہر ہو جائیں گے۔ انہوں نے کہا، ’’حالانکہ، ہم نے کچھ نوجوان کھلاڑیوں کو شامل کیا ہے جنہوں نے عبدالمالک اور درویش رسولی کی طرح اچھی کارکردگی کا مظاہرہ کیا ہے۔”
پہلی بار جنوبی افریقہ سے ون ڈے سیریز کھیلے گا افغانستان
آئندہ سیریز میں افغانستان پہلی بار جنوبی افریقہ کے ساتھ ون ڈے سیریز کھیلے گا۔ دونوں ٹیمیں 2019 اور 2023 ورلڈ کپ میں ون ڈے فارمیٹ میں دو بار آمنے سامنے ہو چکی ہیں، دونوں مواقع پر جنوبی افریقہ نے فتح حاصل کی تھی۔
حشمت اللہ شاہدی افغانستان ٹیم کے کپتان
افغانستان ٹیم: حشمت اللہ شاہدی (کپتان)، رحمت شاہ (نائب کپتان)، رحمان اللہ گرباز (وکٹ کیپر)، اکرام علی خیل (وکٹ کیپر)، عبدالمالک، ریاض حسن، درویش رسولی، عظمت اللہ عمرزئی، محمد نبی، گلبدین نائب، راشد خان، ننگیال خروٹی، اللہ محمد غضنفر، فضل حق فاروقی، بلال سمیع، نوید زدران اور فرید احمد ملک۔
بھارت ایکسپریس۔
