کولکاتا: ہندوستان اور پانچ مرتبہ کی فیفا ورلڈ کپ چیمپئن برازیل کے درمیان کولکاتا کے سالٹ لیک اسٹیڈیم میں کھیلا گیا تاریخی بین الاقوامی دوستانہ فٹبال میچ برازیل کی 4-0 کی کامیابی کے ساتھ ختم ہوا۔ اسکور لائن ہندوستان کے حق میں نہیں رہی، لیکن ہندوستانی ٹیم نے کئی مواقع پر برازیل کو سخت ٹکر دیا اور اس کی کارکردگی فیفا رینکنگ میں دونوں ٹیموں کے درمیان بڑے فرق کی عکاسی نہیں کرتی۔
ہندوستان نے میچ کے ابتدائی لمحات میں دفاعی طور پر نظم و ضبط کا مظاہرہ کیا۔ گول کیپر گرپریت سنگھ سندھو نے بھی ابتدا میں دو عمدہ سیو کرکے برازیل کو برتری حاصل کرنے سے روکے رکھا۔ تاہم پہلے ہاف میں ان کی دو غلطیاں ہندوستان کے لیے مہنگی ثابت ہوئیں۔
برازیل نے 28ویں منٹ میں ایسٹیواؤ کے گول کی مدد سے برتری حاصل کی۔ اس کے بعد 42ویں منٹ میں ایسٹیواؤ نے پیڈرو کے لیے گول کا موقع بنایا اور پیڈرو نے گیند کو جال میں پہنچا کر برازیل کی برتری 2-0 کردی۔ اس موقع پر بھی گرپریت گیند کو قابو میں رکھنے میں ناکام رہے۔
پہلے ہاف کے اختتام پر برازیل کو 2-0 کی برتری حاصل تھی، تاہم ہندوستان نے اس دوران دفاعی طور پر اچھی کارکردگی کا مظاہرہ کیا۔ ہندوستان کے پاس بھی اسکور برابر کرنے کے مواقع آئے، لیکن وہ ان سے فائدہ نہیں اٹھا سکا۔
دوسرے ہاف میں برازیل نے اپنی برتری مزید مضبوط کی۔ متبادل کھلاڑی سیموئل لینو نے 58ویں منٹ میں تیسرا گول کیا۔ انجری ٹائم میں 95ویں منٹ میں لینو نے ایک اور گول کرتے ہوئے برازیل کی جیت 4-0 سے یقینی بنا دی۔
ہندوستان کی جانب سے بھی چند اچھے اٹیک دیکھنے کو ملے۔ فارورڈ ریان ولیمز نے برازیل کے دفاع کو پریشان کیا اور ایک موقع پر ان کا شاٹ گول لائن پر برازیلی کھلاڑی نے کلیئر کردیا، ورنہ ہندوستان اپنا پہلا گول کرنے میں کامیاب ہوسکتا تھا۔
میچ کے نتیجے کے باوجود ہندوستانی ٹیم نے برازیل کے خلاف کئی مرحلوں میں مضبوط کھیل پیش کیا۔ دونوں ٹیموں کے درمیان فیفا رینکنگ میں 133 مقامات کا فرق ہے، لیکن میدان پر ہندوستان نے اس فرق کو کئی مواقع پر نمایاں نہیں ہونے دیا۔
بھارت ایکسپریس۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
