نئی دہلی : فیفا ورلڈ کپ 2026 میں انگلینڈ نے شاندار آغاز کرتے ہوئے کروشیا کو 2-4 سے شکست دے دی۔ ہیری کین کی قیادت میں حاصل ہونے والی اس فتح کے دوران نوجوان مڈفیلڈر جیوڈ بیلنگھم نے ایک تاریخی ریکارڈ اپنے نام کر لیا۔گروپ ایل کے پہلے میچ میں بیلنگھم نے نہ صرف عمدہ کھیل پیش کیا بلکہ ایک اہم گول بھی اسکور کیا۔ 22 سالہ انگلش اسٹار اب دو فیفا ورلڈ کپ اور دو یورو کپ سمیت چار بڑے بین الاقوامی ٹورنامنٹس کھیلنے والے کم عمر ترین یورپی فٹبالر بن گئے ہیں۔بیلنگھم نے یہ اعزاز جرمنی کے جمل موسیالا کو پیچھے چھوڑ کر حاصل کیا۔ انہوں نے پہلی بار یورو 2020 میں کسی بڑے بین الاقوامی ٹورنامنٹ میں شرکت کی تھی، جس کے بعد وہ قطر ورلڈ کپ 2022، یورو 2024 اور اب ورلڈ کپ 2026 میں بھی انگلینڈ کی نمائندگی کر چکے ہیں۔
اس فہرست میں انگلینڈ کے سابق اسٹار مائیکل اوون کا نام بھی شامل ہے، جنہوں نے 1998 اور 2002 کے ورلڈ کپ کے علاوہ یورو 2000 اور یورو 2004 میں شرکت کی تھی۔ جیوڈ بیلنگھم انگلینڈ کے ان چند کھلاڑیوں میں شمار ہوتے ہیں ،جنہوں نے کم عمری میں ہی بین الاقوامی فٹبال میں اپنی جگہ بنا لی۔ انہوں نے محض 17 سال اور 136 دن کی عمر میں انگلینڈ کے لیے ڈیبیو کیا تھا۔ انگلینڈ کی تاریخ میں ان سے کم عمر میں صرف تھیو والکاٹ اور وین رونی نے قومی ٹیم کے لیے پہلا میچ کھیلا تھا۔کروشیا کے خلاف میچ میں انگلینڈ نے ابتدا سے ہی جارحانہ کھیل پیش کیا۔ کپتان ہیری کین نے دو گول اسکور کیے، جب کہ دوسرے ہاف میں جیوڈ بیلنگھم اور مارکس راشفورڈ کے گولز نے ٹیم کی فتح یقینی بنا دی۔
میچ کے بعد بیلنگھم نے کہا کہ ایک بار پھر اپنے ملک کی نمائندگی کرنا ان کے لیے باعثِ فخر ہے۔ انہوں نے کہا کہ اب ان کا اگلا ہدف انگلینڈ کے لیے 50 بین الاقوامی میچ مکمل کرنا ہے۔انہوں نے کہا، ’’میری ذمہ داری ہے کہ جب میں میدان میں اتروں تو اپنی ٹیم اور اپنے ملک کے لیے سو فیصد دوں۔ جب سینے پر انگلینڈ کا بیج اور پشت پر نمبر 10 ہو تو میں اپنی تمام تر صلاحیتیں ٹیم کے لیے وقف کرنا چاہتا ہوں۔‘‘بیلنگھم نے مزید کہا کہ یہ سیزن ان کے لیے انتہائی طویل اور تھکا دینے والا رہا، جس کے دوران وہ کئی مواقع پر ٹریننگ کیمپس سے بھی دور رہے، لیکن انہیں یقین تھا کہ بڑے مقابلوں میں وہ اپنی ٹیم کے لیے بہترین کارکردگی دکھائیں گے۔
چار بڑے بین الاقوامی ٹورنامنٹس کھیلنے والے کم عمر ترین یورپی کھلاڑی
جیوڈ بیلنگھم (انگلینڈ) — 22 سال 353 دن
جمال موسیالا (جرمنی) — 23 سال 108 دن
پیڈری (اسپین) — 23 سال 202 دن
جیریمی ڈوکو (بیلجیم) — 24 سال 19 دن
مائیکل اوون (انگلینڈ) — 24 سال 182 دن
لوکاس پوڈولسکی (جرمنی) — 25 سال 9 دن
جیوڈ بیلنگھم کی یہ کامیابی نہ صرف ان کے شاندار کیریئر کا ایک اور سنگ میل ہے بلکہ انگلینڈ کے لیے ورلڈ کپ مہم کے آغاز پر ایک حوصلہ افزا اشارہ بھی سمجھی جا رہی ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
