Delhi-NCR Weather Update: دہلی-این سی آر میں شدید سردی کی لہر  جاری، ہماچل-اتراکھنڈ میں برف باری کی وارننگ

 دہلی-این سی آر سمیت ملک بھر کی کئی ریاستوں میں سال کے آخری دنوں میں موسم کا انداز بدل گیا ہے۔ دہلی میں گزشتہ دو تین دنوں سے موسلادھار بارش اور ژالہ باری کی وجہ سے پارہ  کافی گر گیا ہے۔ جس کی وجہ سے کپکپانے والی سردی نے لوگوں کا برا حال کردیا ہے۔ آج بھی محکمہ موسمیات نے دہلی میں اورنج الرٹ جاری کیا ہے۔

ہندوستان کے محکمہ موسمیات (آئی ایم ڈی) نے اتوار سے شمالی ہندوستان میں سردی کی لہر کی پیش گوئی کی ہے۔ اس کا مطلب ہے کہ نئے سال کی آمد مزید شدید سردی کے ساتھ شروع ہونے والی ہے۔ قومی راجدھانی دہلی اور این سی آر میں گزشتہ چند دنوں سے موسلادھار بارش ہو رہی ہے۔ جس کے باعث درجہ حرارت میں کمی ریکارڈ کی گئی۔ اترکاشی، اتراکھنڈ کے گنگوتری اور یمونوتری میں سردی مزید بڑھ گئی ہے۔ محکمہ موسمیات نے اترکاشی ضلع میں شدید برف باری اور بارش کا الرٹ جاری کیا ہے۔ محکمہ کے مطابق ضلع میں 2200 میٹر کی بلندی پر واقع علاقوں میں موسم میں مزید تبدیلی کا امکان ہے۔ ان علاقوں میں شدید برف باری اور بارش ہو سکتی ہے ،جس سے سردی میں مزید اضافہ ہو سکتا ہے۔

برف باری کے باعث درجہ حرارت میں نمایاں کمی ریکارڈ کی گئی

پہاڑوں پر گزشتہ دو روز سے برف باری کا سلسلہ جاری ہے ،جس کے باعث میدانی علاقوں میں سردی کی شدت میں مزید اضافہ ہوا ہے۔ برف باری کے باعث درجہ حرارت میں نمایاں کمی ریکارڈ کی گئی ہے۔ آئی ایم ڈی کے مطابق آنے والے دنوں میں درجہ حرارت 3 سے 5 ڈگری سیلسیس گر سکتا ہے۔ یکم جنوری سے شدید سردی پڑنے والی ہے۔

دہلی میں گھنے دھند کی پیش گوئی

محکمہ موسمیات نے اتوار کو دہلی-این سی آر میں گھنے دھند کی پیش گوئی کی ہے اور زیادہ سے زیادہ اور کم سے کم درجہ حرارت بالترتیب 17 اور 9 ڈگری سیلسیس رہنے کا امکان ہے۔ قابل ذکر بات یہ ہے کہ  مرکزی آلودگی کنٹرول بورڈ کے اعداد و شمار کے مطابق، دہلی میں ہوا کا معیار بہتر ہوا اور ہوا کے معیار کا انڈیکس (AQI) ہفتہ کی شام 4 بجے 135 پر ریکارڈ کیا گیا۔ 28 میں سے چار مانیٹرنگ اسٹیشنوں پر AQI – IHBAS دلشاد گارڈن، لودھی روڈ اور سری اروبندو مارگ – ‘اطمینان بخش’ زمرے میں ریکارڈ کیا گیا اور 100 سے نیچے رہا۔ باقی مراکز میں، AQI ‘اعتدال پسند’ اور ‘غراب’ زمروں میں ریکارڈ کیا گیا۔

بھارت ایکسپریس