South Korea plane crash: جنوبی کوریا میں خوف ناک حادثہ، لینڈنگ کے دوران طیارہ حادثہ کا شکار، 179 افراد ہلاک

سیول: جنوبی کوریا میں طیارے کے حادثے میں 179 افراد کے ہلاک ہونے کی اطلاع ہے۔ بتایا جاتا ہے کہ جیجو ایئر کا طیارہ لینڈنگ کے دوران رن وے سے پھسل کر گر کر تباہ ہو گیا۔ طیارے میں کل 181 افراد سوار تھے، جن میں 175 مسافر اور عملے کے 6 ارکان شامل تھے۔ خبر رساں ادارے یونہاپ کے مطابق جنوبی کوریا کے موان انٹرنیشنل ایئرپورٹ پر ایک طیارہ رن وے سے پھسل کر باؤنڈری وال سے ٹکرا گیا اور آگ لگ گئی،اس وقت موان انٹرنیشنل ایئرپورٹ پر ریسکیو آپریشن
جاری ہے۔

طیارہ تھائی لینڈ سے واپس آرہا تھا

معلومات کے مطابق یہ طیارہ جیجو ایئر کی فلائٹ نمبر 2216 تھا جو بنکاک سے جنوبی کوریا واپس آ رہا تھا۔ لینڈنگ کے دوران طیارے کے لینڈنگ گیئر میں تکنیکی خرابی پیدا ہوگئی جس کے باعث طیارہ رن وے سے پھسل گیا۔ اس کے بعد طیارہ باؤنڈری وال سے ٹکرا گیا اور آگ لگ گئی۔ آگ لگنے کے بعد ایئرپورٹ پر خوف وہراس پھیل گیا اور فوری طور پر ریسکیو آپریشن شروع کر دیا گیا۔

ملبے سے دو افراد کو زندہ نکالا گیا

ذرائع کے مطابق لینڈنگ گیئر میں خرابی حادثے کی وجہ بتائی جا رہی ہے۔ نیشنل فائر ایجنسی نے کہا کہ حادثے کے بعد لگنے والی آگ پر قابو پالیا گیاہے۔ خبر لکھے جانے تک ریسکیو آپریشن جاری ہے۔ طیارے کے ملبے سے مسافروں کو نکالا جا ۔رہا ہے۔ فی الحال ریسکیو آپریشن کے دوران دو افراد کو زندہ بچا لیا گیا ہے۔ اس میں ایک مسافر اور ایک کریئو ممبر شامل ہے۔

بھارت ایکسپریس