Massive fire in Sirmaur district: ہماچل پردیش کے سرمور میں خوفناک آتش زدگی، چھ افراد زندہ جل کر ہلاک

شملہ: ہماچل پردیش کے ضلع سرمور کے تلگنا گاؤں میں بدھ کی دیر رات ایک بھیانک آگ لگنے کے نتیجے میں ایک ہی خاندان کے چھ افراد زندہ جل کر ہلاک ہو گئے۔ پولیس نے اس واقعے کی تصدیق کی ہے۔ یہ حادثہ رات تقریباً 2 بجے پیش آیا۔ آگ اتنی تیزی سے پھیلی کہ گھر میں موجود افراد کو باہر نکلنے کا موقع ہی نہیں مل سکا۔ حالانکہ، خاندان کا ایک فرد اس حادثے میں بچ گیا۔

بری طرح جھلسے لاشوں کی شناخت مشکل

ہلاک ہونے والوں میں نریش، ان کی بیوی ترپتا، ان کی رشتہ دار کویتا اور تین بچے—ساریکا، کرتیکا اور کرتک شامل ہیں۔ ایک افسر کے مطابق لاشیں بری طرح جھلس چکی تھیں، جس کی وجہ سے ان کی شناخت کرنا مشکل ہو گیا۔

شارٹ سرکٹ کی وجہ سے لگی گھر میں آگ

اس حادثے میں کویتا کے شوہر لوکیندر بچ گئے، جنہیں گاؤں والوں نے شدید زخمی حالت میں باہر نکالا۔ انہیں علاج کے لیے سولن کے ایک اسپتال میں داخل کرایا گیا ہے۔ ابتدائی معلومات کے مطابق آگ لگنے کی وجہ شارٹ سرکٹ بتائی جا رہی ہے۔ آگ کے دوران گھر میں رکھا ایل پی جی سلنڈر بھی پھٹ گیا، جس کے باعث پورا مکان جل کر راکھ ہو گیا۔ اطلاعات کے مطابق اس حادثے میں پالتو جانور بھی زندہ جل گئے۔

ریاست میں آگ لگنے کا یہ دوسرا بڑا واقعہ

یہ رواں ہفتے ریاست میں آگ لگنے کا دوسرا بڑا واقعہ ہے۔ اس سے قبل ضلع سولن کے ارکی شہر کے پرانے بس اسٹینڈ علاقے میں رہائشی عمارتوں میں شدید آگ لگی تھی، جس میں 10 افراد کی جان چلی گئی تھی۔ فی الحال کچھ افراد کے لاپتہ ہونے کی بھی اطلاع ہے۔ ہلاک ہونے والے افراد کی درست شناخت کے لیے ڈی این اے پروفائلنگ کرائی جا رہی ہے۔

اس معاملے میں بی جے پی نے ضلعی انتظامیہ سے مطالبہ کیا ہے کہ متاثرہ خاندان کو فوری طور پر ہر ممکن مدد فراہم کی جائے۔ پارٹی نے مناسب معاوضہ، راحت اور بازآبادکاری کے انتظامات کو یقینی بنانے کی بھی اپیل کی ہے۔ پارٹی نے اپنے بیان میں کہا کہ اس غم کی گھڑی میں وہ متاثرہ خاندان کے ساتھ پوری مضبوطی سے کھڑی ہے۔

بھارت ایکسپریس۔