Delhi Assembly Election 2025: کانگریس نیا چاندنی چوک بناکرعوام کی امیدوں پر کھرا اترے گی: مدت اگروال کا عزم

نئی دہلی: دہلی اسمبلی الیکشن 2025 کی ووٹنگ میں اب 10 دن سے کم باقی رہ گئے ہیں۔ چاندنی چوک سے کانگریس امیدوارمدت اگروال نے بھارت ایکسپریس اردو سے خصوصی بات  چیت میں عام آدمی پارٹی پر بڑا الزام لگاتے ہوئے کہا کہ اروند کیجریوال کی حکومت نے چاندنی چوک کو نظرانداز کردیا ہے، لیکن ہم جیت حاصل کرنے کے بعد نیا چاندنی چوک بنائیں گے۔ انہوں نے کہا کہ ہمارا خاندان 100 سالوں سے زیادہ سے کانگریس پارٹی سے وابستہ ہے اور ہم عوام کی خدمت کرتے رہے ہیں، ہماری فیملی نے ملک کی جنگ آزادی میں حصہ لیا ہے، اس لئے ہمارے بارے میں دہلی کی عوام بخوبی واقف ہے۔

کانگریس کے سینئرلیڈر، سابق ریاستی صدراورسابق رکن پارلیمنٹ جے پرکاش اگروال کے بیٹے اور کانگریس امیدوارمدت اگروال نے کہا کہ چاندنی چوک ری ڈیولیمنٹ کے نام پربدعنوانی کی گئی، جو کچھ کیا گیا وہ صرف اپنی جیب بھرنے کے لئے کیا گیا۔ موجودہ رکن اسمبلی پرہلاد سنگھ ساہنی لوگوں کو خوفزدہ کرنے کی کوشش کررہے ہیں، لیکن ان کو یہ نہیں معلوم ہے کہ لوگ ان سے خوفزدہ نہیں ہوں گے۔ انہوں نے بتایا کہ ہمارے دفترجہاں کھل رہے ہیں، میرے ان دوستوں کو دھمکانے کی کوشش کی جارہی ہے، لیکن وہ ہمیں روکنے میں کامیاب نہیں ہوں گے۔

کانگریس امیدوارنے کہا کہ پرہلاد سنگھ کو کئی بارلوگوں نے آزمایا ہے اور وہ لوگوں کوتقسیم کرنے کی کوشش کررہے ہیں۔ انہوں نے اب اپنے بیٹے کوامیدواربنایا ہے، لیکن عوام کو ان کو بخوبی سمجھ چکی ہے۔ مدت اگروال نے کہا کہ کانگریس پارٹی نے دہلی میں ترقیاتی کام کرائے ہیں، عام آدمی پارٹی کی حکومت آنے کے بعد سے ترقیاتی کام ٹھپ ہوگئے ہیں، اروند کیجریوال نے صرف لوگوں سے لبھاؤنے وعدے کئے اورانہیں پوری طرح سے نظراندازکردیا ہے۔ اب لوگ شیلا دکشت والی دہلی کو یاد کررہے ہیں۔ اس الیکشن میں کانگریس پارٹی بہتر کارکردگی کا مظاہرہ کرے گی اوردہلی کی عوام بی جے پی اورعام آدمی پارٹی کو ایک ساتھ جواب دے گی۔