Republic Day 2025: وزیر اعظم مودی نے یوم جمہوریہ پر ہم وطنوں کو دی مبارکباد، ملکارجن کھڑگے نے خط میں لکھ دی یہ بات

نئی دہلی: ہندوستان آج یوم جمہوریہ منا رہا ہے۔ قومی تہوار پر ہم وطنوں کو مبارکباد دیتے ہوئے وزیر اعظم نریندر مودی نے اسے آئین کی اقدار کے تحفظ کی علامت قرار دیا۔ وزیر اعظم مودی نے سوشل میڈیا پلیٹ فارم پر لکھا، ’’آج ہم اپنی شاندار جمہوریہ کی 75 ویں سالگرہ منا رہے ہیں۔ اس موقع پر ہم ان تمام عظیم شخصیات کو سلام پیش کرتے ہیں جنہوں نے ہمارے آئین کا مسودہ بنا کر اس بات کو یقینی بنایا کہ ہماری ترقی کا سفر جمہوریت، وقار اور اتحاد پر مبنی ہو۔ یہ قومی تہوار ہمارے آئین کی اقدار کو محفوظ رکھنے کے ساتھ ہی ایک مضبوط اور خوشحال ہندوستان بنانے کی سمت میں ہماری کوششوں کو مزید تقویت دے، یہی تمنا ہے۔

اس موقع پر کانگریس کے قومی صدر ملکارجن کھڑگے نے ہم وطنوں کے نام ایک کھلا خط لکھا ہے۔ اس میں انہوں نے یوم جمہوریہ کی نیک خواہشات کے ساتھ دستور کی اہمیت کو بھی سمجھانے کی کوشش کی ہے۔ پوسٹ میں، انہوں نے لکھا، ’’انڈین نیشنل کانگریس کی طرف سے، میں آپ سب کو یوم جمہوریہ پر دل کی گہرائیوں سے نیک خواہشات پیش کرتا ہوں۔ اس سال، ہم ہندوستانی جمہوریہ کے ضمیر اور روح کو اپنانے کے 75 سال مکمل کر رہے ہیں۔ میں اس پر اپنا پیغام شیئر کر رہا ہوں۔” اس خط میں انہوں نے عظیم انسانوں کو یاد کرتے ہوئے آئین کی طاقت کی تعریف کی ہے۔

بتا دیں کہ آج یوم جمہوریہ کے موقع پر صدر دروپدی مرمو صبح 10:30 بجے کرتویہ پتھ پر ترنگا لہرائیں گے۔ انڈونیشیا کے صدر پرابوو سوبیانتو اس بار مہمان خصوصی ہیں۔ وزیر اعظم مودی کے علاوہ راج ناتھ سنگھ اور اپوزیشن لیڈر راہل گاندھی بھی یہاں موجود رہیں گے۔

اس بار یوم جمہوریہ کا تھیم ’گولڈن انڈیا-ہیریٹیج اینڈ ڈویلپمنٹ‘ ہے۔ پریڈ دیکھنے کے لیے ہزاروں کی تعداد میں خصوصی مہمانوں کو مدعو کیا گیا ہے۔ ان میں پیرا اولمپک ٹیمیں، بہترین کارکردگی کا مظاہرہ کرنے والے گاؤں کے سرپنچ، جنگلی حیات کے تحفظ کے کارکن وغیرہ شامل ہیں۔

بھارت ایکسپریس۔