Bharat Express DD Free Dish

European Forces Raid Russian Oil Tanker: بحیرہ روم میں روسی تیل بردار جہاز پر یورپی فورسز کی چھاپہ ماری، جعلی پرچم کے تحت چلتا پایا گیا ’ایم وی میڈاگ‘

یورپی یونین کی خارجہ پالیسی کی سربراہ کایا کالاس نے کہا کہ پیر کو یورپی یونین کے وزرائے خارجہ روس کے خلاف نئی پابندیوں کی منظوری دینے والے ہیں۔ ان پابندیوں کے دائرے میں ان بینکوں، خریداروں اور کمپنیوں کو بھی شامل کیا جائے گا جو ’شیڈو فلیٹ‘ کی حمایت کر رہے ہیں۔

نئی دہلی: یورپی یونین (ای یو) کی خارجہ پالیسی کی سربراہ کایا کالاس نے اتوار کے روز بتایا کہ بحیرہ روم میں یورپی فورسز نے جمعہ کے روز روسی تیل بردار جہاز ’ایم وی میڈاگ‘ کی تلاشی لی۔ تحقیقات کے دوران یہ جہاز جعلی پرچم کے تحت چلتا ہوا پایا گیا۔

روس کے شیڈو فلیٹ سے تعلق کا شبہ

کایا کالاس نے سوشل میڈیا پلیٹ فارم ’ایکس‘ پر ایک پوسٹ کے ذریعے اس کارروائی کی اطلاع دی۔ انہوں نے بتایا کہ 13 نومبر کو ’آپریشن ایونا فور میڈ ائرینی‘ کے تحت یورپی فورسز نے بحیرہ روم میں ایک ایسے ٹینکر پر سوار ہو کر اس کی تلاشی لی، جس کے بارے میں شبہ تھا کہ اس کا تعلق روس کے ’شیڈو فلیٹ‘ سے ہے۔ اقوام متحدہ کے سمندری قانون (یو این سی ایل او ایس) کے آرٹیکل 110 کے تحت کی گئی اس کارروائی میں اس بات کی تصدیق ہوئی کہ ’ایم وی میڈاگ‘ نامی جہاز جعلی پرچم کے تحت چل رہا تھا۔

شیڈو فلیٹ کے خلاف کارروائی جاری رکھنے کا اعلان

کالاس نے بتایا کہ یورپی یونین روس کے ’شیڈو فلیٹ‘ کے خلاف سمندری اور سفارتی دونوں سطحوں پر اپنی کارروائیاں جاری رکھے گا۔ انہوں نے کہا کہ پیر کو یورپی یونین کے وزرائے خارجہ روس کے خلاف نئی پابندیوں کی منظوری دینے والے ہیں۔ ان پابندیوں کے دائرے میں ان بینکوں، خریداروں اور کمپنیوں کو بھی شامل کیا جائے گا جو ’شیڈو فلیٹ‘ کی حمایت کر رہے ہیں۔

ایک ماہ قبل روس پر تقریباً 1600 نئی پابندیاں عائد

اس سے تقریباً ایک ماہ قبل بھی یورپی یونین نے روس کی جارحیت پر قابو پانے کے مقصد سے سخت پابندیاں عائد کی تھیں۔ یورپی یونین کی خارجہ پالیسی کی سربراہ کایا کالاس کے مطابق، یورپی یونین کے وزرائے خارجہ نے روس کے خلاف تقریباً 1600 نئی پابندیوں کی منظوری دی تھی۔ اسے پابندیوں کے حوالے سے اب تک کی سب سے بڑی کارروائی قرار دیا گیا تھا۔

کالاس نے سوشل میڈیا پلیٹ فارم ’ایکس‘ پر لکھا، ’’یورپی یونین کے وزرائے خارجہ نے روس کے فوجی و صنعتی ڈھانچے کو نشانہ بناتے ہوئے تقریباً 1600 نئی پابندیوں کی منظوری دی ہے۔ روس کی جانب سے جنگ شروع کیے جانے کے بعد سے پابندیوں کی فہرست میں یہ اب تک کی سب سے بڑی توسیع ہے۔ یورپ نے ایک بار پھر ثابت کیا ہے کہ وہ اس معاملے پر متحد ہو کر کھڑا ہے۔‘‘

بھارت ایکسپریس۔



بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔

Also Read