نئی دہلی : وزیر اعظم نریندر مودی نے ہفتہ کے روز آندھرا پردیش کے ضلع وجیانگرم کے بھوگاپورم میں تعمیر کیے گئے الوری سیتارام راجو انٹرنیشنل (گرین فیلڈ) ایئرپورٹ کا افتتاح کیا۔ یہ جدید ہوائی اڈہ پبلک پرائیویٹ پارٹنرشپ (پی پی پی) ماڈل کے تحت تقریباً 5,640 کروڑ روپے کی لاگت سے تیار کیا گیا ہے۔ افتتاح کے بعد وزیر اعظم نے مسافر ٹرمینل عمارت کا معائنہ کیا اور وہاں دستیاب جدید سہولتوں اور ٹیکنالوجی کے بارے میں تفصیلی معلومات حاصل کیں۔اس موقع پر آندھرا پردیش کے گورنر ایس عبدالنذیر، وزیر اعلیٰ این چندر بابو نائیڈو، نائب وزیر اعلیٰ پون کلیان، مرکزی وزیر شہری ہوابازی کے رام موہن نائیڈو اور جی ایم آر گروپ کے اعلیٰ حکام بھی موجود تھے۔ حکام نے وزیر اعظم کو ایئرپورٹ کی تکنیکی خصوصیات، جدید نظام اور مستقبل کے توسیعی منصوبوں سے آگاہ کیا۔
آندھرا کی ثقافت کی عکاسی
ایئرپورٹ کے مسافر ٹرمینل کو آندھرا پردیش کی ثقافت، روایات اور لوک فنون کے موضوع پر ڈیزائن کیا گیا ہے۔ داخلی دروازے پر آندھرا کی مشہور ایٹیکوپاکا آرٹ کی نمائش نے وزیر اعظم کی خصوصی توجہ حاصل کی۔ ایئرپورٹ سے جلسہ گاہ تک روانگی کے دوران قبائلی خواتین نے روایتی دھیمسا رقص پیش کر کے وزیر اعظم کا خیرمقدم کیا۔سرکاری حکام کے مطابق تقریباً 13,500 قبائلی خواتین نے بیک وقت دھیمسا رقص پیش کر کے گنیز ورلڈ ریکارڈ بھی قائم کیا۔ وزیر اعظم نے تالیاں بجا کر فنکاروں کی حوصلہ افزائی کی اور ان کی ثقافتی پیشکش کو سراہا۔
#WATCH | Prime Minister @narendramodi inaugurates the Alluri Sitarama Raju International Airport at Bhogapuram.
@MoCA_GoI @PMOIndia @MIB_India @PIB_India #PMModi #Bhogapuram #AirportInauguration #BhogapuramAirport #Aviation #AndhraPradesh #Airport #Connectivity pic.twitter.com/yEgctrpwSF— DD News (@DDNewslive) August 1, 2026
سالانہ 60 لاکھ مسافروں کی گنجائش
بھوگاپورم گرین فیلڈ انٹرنیشنل ایئرپورٹ کو سالانہ تقریباً 60 لاکھ مسافروں کی آمدورفت کو مدنظر رکھتے ہوئے تیار کیا گیا ہے۔ مسافروں کو تیز، محفوظ اور آسان سفری سہولت فراہم کرنے کے لیے یہاں مصنوعی ذہانت(اے آئی) ، بلڈنگ انفارمیشن ماڈلنگ (بی آئی ایم)، ایئرسائیڈ 4.0 ٹیکنالوجی، ایئرپورٹ پریڈکٹیو آپریشنز سینٹر (APOC)، بایومیٹرک مسافر پروسیسنگ، خودکار بیگیج ہینڈلنگ سسٹم اور انٹیلی جنٹ آپریشنل مانیٹرنگ سمیت کئی جدید ترین نظام نصب کیے گئے ہیں۔
17,900 کروڑ روپے سے زائد کے ترقیاتی منصوبوں کا تحفہ
بھوگاپورم میں منعقدہ عوامی جلسے کے دوران وزیر اعظم نریندر مودی نے 17,900 کروڑ روپے سے زائد مالیت کے مختلف ترقیاتی منصوبوں کا سنگ بنیاد رکھا، کئی منصوبوں کا افتتاح کیا اور متعدد اسکیمیں قوم کے نام وقف کیں۔حکومت کا کہنا ہے کہ نئے بین الاقوامی ہوائی اڈے سے آندھرا پردیش میں سیاحت، تجارت، سرمایہ کاری اور روزگار کے نئے مواقع پیدا ہوں گے، جبکہ ریاست کی فضائی رابطہ کاری مزید مضبوط ہوگی اور خطے کی معاشی ترقی کو نئی رفتار ملے گی۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
