INDIA alliance Coordination Committee meeting: اپوزیشن اتحاد کی رابطہ کمیٹی کی میٹنگ ختم، لئے گئے کئی اہم فیصلے،چند ٹی وی اینکرز کے بائیکاٹ کا بھی لیا فیصلہ

اپوزیشن اتحاد کی کوآرڈینیشن کمیٹی کا اجلاس ختم ہوگیا ہے۔ اس اجلاس میں کئی اہم فیصلے کئے گئے ہیں ۔ میٹنگ کے اختتام پر کانگریس نے کہا کہ ہندوستان اتحاد کی کوآرڈینیشن کمیٹی کا اجلاس آج دہلی میں اختتام پذیر ہوا۔ ہم نے مل کر جمہوریت کے تحفظ کا عزم کیا ہے، اسے ضرور پورا کریں گے۔میٹنگ کے بعد کانگریس جنرل سکریٹری کے سی وینوگوپال نے پریس کانفرنس میں کہا کہ انڈیا اتحا د کی  ریلی میں مہنگائی، بے روزگاری اور بی جے پی کی بدعنوانی کے مسائل کو زوروں سے اٹھایا جائے گا۔ ہم نے یہ بھی فیصلہ کیا ہے کہ انڈیا اتحاد کا کوئی لیڈر چند میڈیا گروپس کے اینکرز کے شوز میں شرکت نہیں کرے گا۔

کانگریس تنظیم کے جنرل سکریٹری کے سی وینوگوپال نے کہا کہ میٹنگ میں فیصلہ کیا گیا ہے کہ اکتوبر کے پہلے ہفتہ میں بھوپال میں اپوزیشن کی پہلی مشترکہ ریلی نکالی جائے گی۔ رابطہ کمیٹی نے سیٹوں کی تقسیم کا فیصلہ کرنے کا عمل جلد شروع کرنے کا فیصلہ کیا ہے۔ فیصلہ یہ بھی  کیا گیا کہ ممبران جماعتیں مذاکرات کریں گی اور جلد از جلد سیٹ پر فیصلہ کریں گی۔ آج کے اجلاس میں 12 جماعتوں کے قائدین نے شرکت کی۔ ٹی ایم سی کے ابھیشیک بنرجی بی جے پی اور پی ایم مودی کے سیاسی انتقام کی وجہ سے ای ڈی کے سامنے پیش ہوئے ہیں جس کی وجہ سے وہ  میٹنگ میں شرکت نہیں کر سکے۔

رابطہ کمیٹی کی میٹنگ کے بعدعام آدمی پارٹی کے رکن پارلیمنٹ راگھو چڈھا نے کہا کہ تمام پارٹیاں جلد از جلد سیٹوں کی تقسیم پر فیصلہ لیں گی۔ اکتوبر کے پہلے ہفتے میں بھوپال میں مشترکہ عوامی ریلی نکالی جائے گی۔ذات پر مبنی مردم شماری کے مسئلے کو بھی اٹھایا جائے گا۔

رابطہ کمیٹی کے اجلاس کے بعد نیشنل کانفرنس کے رہنما عمر عبداللہ نے کہا کہ جو سیٹیں پہلے ہی انڈیا بلاک کے ممبران کے پاس ہیں ان پر بات نہیں ہونی چاہیے، ہمیں بی جے پی، این ڈی اے یا ان پارٹیوں کے پاس موجود سیٹوں پر بات کرنی چاہیے جو کسی کا حصہ نہیں ہیں۔

جھارکھنڈ کے وزیر اعلیٰ ہیمنت سورین نے انڈیا اتحاد کی رابطہ کمیٹی کی میٹنگ کے بعد کہا کہ آج کی میٹنگ میں جو بھی بات ہوئی، کے سی وینوگوپال نے آپ کے سامنے رکھ دی ہے۔ تمام پیش رفت پر نظر رکھتے ہوئے انڈیا الائنس اپنی حکمت عملی پر کام کر رہا ہے۔

انڈیا الائنس کی رابطہ کمیٹی کی میٹنگ کے بعد پی ڈی پی سربراہ محبوبہ مفتی نے کہا کہ مدھیہ پردیش میں بڑے گھوٹالے ہوئے ہیں۔ بیروزگاری اور مہنگائی کے مسائل پر بات ہوئی۔بہت جلد سیٹ کی تقسیم کا بھی فیصلہ لیا گیا ہے۔

سی پی آئی لیڈر ڈی راجا نے میٹنگ کے اختتام پر کہا کہ یہ پہلی میٹنگ تھی رابطہ کمیٹی کی ، جس میں کئی اہم مدعوں پر بات کی گئی ہے ۔ بہت جلد جماعتیں سیٹ کی تقسیم کے مسئلے کو حل کرلیں گی  اور یہ معاملہ ریاستی سطح پر ہوگا۔ریاست در ریاست سیٹ کی تقسیم پارٹیوں کو حساب سے ہوگی۔اس دوران اسمبلی انتخابات کا بھی خیال رکھا جائےگا۔اس کے بعد  ریلی  وغیرہ کے معاملے پر بھی بات کی گئی  ہے۔

سماجوادی پارٹی کے راجیہ سبھا رکن جاوید علی خان نے کہا کہ آج کی میٹنگ میں بنیادی طور پر چار اہم نکات پر بات کی گئی ہے اور فیصلہ کیا گیا ہے۔ پہلی بات یہ طے پائی ہے کہ جلد سے جلد سیٹ شیئرنگ کا کام ختم کرلیا جائے۔ دوسری بات یہ طے پائی ہے کہ اکتوبر کے پہلے ہفتے میں بھوپال کے اندر اپوزیشن اتحاد کی ریلی ہوگی جس میں مہنگائی ، بے روزگاری اور بی جے پی حکومت کے کرپشن پر سرکار کو گھیرا جائے گا۔ تیسری چیز جو طے پائی ہے وہ یہ کہ میڈیا میں چند بدنام اینکرز جو دن رات زہر پھیلاتے رہتے ہیں ان کے بائیکاٹ پر اتفاق ہوگیا اور چوتھی بات یہ طے پائی ہے کہ ذات پر مبنی مردم شماری پر ہرکوئی راضی ہے اور اس کو 2024 میں مدعا بنایا جائے گا۔

بھارت ایکسپریس۔