BBC Documentary Row: جے این یو، جامعہ اور امبیڈکر یونیورسٹی کے بعد اب دہلی یونیورسٹی میں بی بی سی ڈاکیومنٹری پر ہنگامہ

BBC Documentary Controversy: دہلی یونیورسٹی میں بی بی سی کی ڈاکیومنٹری ‘انڈیا: دی مودی کوئشچن’ سے پیدا ہوا تنازعہ بڑھتا جا رہا ہے۔ جامعہ ملیہ اسلامیہ، جواہرلال نہرو یونیورسٹی اورامبیڈکریونیورسٹی کے بعد اب جمعہ کے روز دہلی یونیورسٹی میں ڈاکیومنٹری کی اسکریننگ روکنے کے لئے یونیورسٹی انتظامیہ نے بجلی کاٹ دی، جس کے بعد وہاں طلبا نے ہنگامہ کرنا شروع کردیا۔ ہنگامہ آرائی میں اضافہ ہوتا ہوا دیکھ کر یونیورسٹی میں دفعہ 144 نافذ کردی گئی۔ اس کے علاوہ دہلی یونیورسٹی سے 4 طلبا کو حراست میں لے لیا گیا ہے۔

دہلی یونیورسٹی میں کچھ طلبہ تنظیموں نے بی بی سی کی ڈاکیومنٹری کی اسکریننگ کا اعلان کیا تھا۔ طلبا کا کہنا تھا کہ جمعہ کی شام 4 بجے آرٹس فیکلٹی کے گیٹ نمبر4 پر ڈاکیومنٹری کی اسکریننگ ہوگی۔ حالانکہ دہلی یونیورسٹی کا کہنا ہے کہ انہوں نے ایسے کسی بھی انعقاد کی اجازت نہیں دی ہے۔

واضح رہے کہ ہندوستانی حکومت نے بی بی سی کی ڈاکیومنٹری کو وزیراعظم اور ملک کے خلاف پروپیگنڈہ بتاچکی ہے۔ وزارت خارجہ اس سے متعلق کہہ چکا ہے کہ ہم نہیں جانتے کہ ڈاکیومنٹری کے پیچھے کیا ایجنڈا ہے، لیکن یہ منصفانہ نہیں ہے، یہ پروپیگنڈہ ہے۔