Lok Sabha Election 2024: گجرات کی بھروچ سیٹ AAP کے کھاتے میں جانے سے ناراض احمد پٹیل کی بیٹی ممتاز نے کہی یہ بڑی بات

اس سے پہلے جب بھروچ سیٹ عام آدمی پارٹی کے کھاتے میں جانے کی بات سامنے آئی تھی تب ممتاز پٹیل نے میڈیا سے بات کرتے ہوئے کہا تھا کہ انہیں امید ہے کہ یہ سیٹ کانگریس کو ملے گی۔ کانگریس لیڈر نے یہ بھی کہا تھا کہ سنا ہے کہ راہل گاندھی نے بھی بھروچ سیٹ عام آدمی پارٹی کو دیئے جانے پراعتراض کیا ہے۔ انہوں نے کہا تھا کہ بھروچ روایتی طور پرکانگریس کی سیٹ ہے۔ انہوں نے کہا کہ اس سیٹ پر کانگریس نے جو ترقی کی، یہاں ہماری بنیاد ہے، اسی کے سبب عام آدمی پارٹی الائنس کرنا چاہتی ہے۔

بھروچ سے احمد پٹیل لڑتے تھے الیکشن

دراصل، بھروچ سیٹ کانگریس کی روایتی سیٹ مانی جاتی ہے۔ مرحوم لیڈراحمد پٹیل اسی سیٹ کی نمائندگی کرتے رہے۔ ایسے میں نہ صرف ممتازبلکہ احمد پٹیل کے بیٹے فیصل احمد پٹیل سمیت پارٹی کے کئی لیڈران چاہتے تھے کہ یہ سیٹ کانگریس کو ملے۔ اس کے لئے ان سبھی لوگوں نے کانگریس اعلیٰ کمان سے گزارش بھی کی تھی۔ حالانکہ سیٹ شیئرنگ پرغوروخوض کے بعد یہ سیٹ اب عام آدمی پارٹی کے پاس چلی گئی ہے۔ ظاہر ہے کہ اس سے مرحوم احمد پٹیل کی فیملی میں ناراضگی ہوگی۔ واضح رہے کہ گجرات سے لوک سبھا پہنچنے والے احمد پٹیل آخری مسلم رکن پارلیمنٹ تھے۔ احمد پٹیل 26 سال کی عمرمیں پہلی بار 1977 میں رکن پارلیمنٹ بنے اور پھر 1982 اور 1984 میں بھروچ سے جیت درج کی تھی۔