Uddhav Thackeray on Waqf Amendment Bill: مرکزی حکومت وقف بل صرف اپنے دوستوں کو وقف کی زمین دینے کے لیے لائی ہے، ادھو ٹھاکرے کا بی جے پی پر بڑا حملہ، پوچھا-وقف بل کا ہندوتوا سے کیا تعلق؟

شیوسینا (ادھو بالاصاحب ٹھاکرے) کے سربراہ ادھو ٹھاکرے نے جمعرات کو دعویٰ کیا کہ مرکزی حکومت کی نظر وقف بورڈ کی زمین پر ہے اور مستقبل میں وہ مندروں، گرجا گھروں اور گوردواروں کی زمین پر بھی نظریں گڑا سکتی ہے۔ لوک سبھا سے بل کی منظوری کے چند گھنٹوں بعد ایک پریس کانفرنس میں ادھو ٹھاکرے نے کہا کہ ان کی پارٹی نے وقف ترمیمی بل پر بی جے پی کے موقف کی مخالفت کرتی ہے اور یہ قانون’’اس (وقف) کی زمین چھین کر اسے اپنے صنعت کار دوستوں کی سازش‘‘ ہے۔

واضح رہے کہ شیو سینا (یو بی ٹی) پہلے بی جے پی کی اتحادی تھی، لیکن فی الحال انڈیا اتحاد کا حصہ ہے۔ ادھو ٹھاکرے کے اس بیان پر ردعمل دیتے ہوئے مہاراشٹر کے نائب وزیر ایکناتھ شندے نے کہا ہےکہ ادھو ٹھاکرے کا یہ بیان کانگریس سے ہاتھ ملانے سے بھی ’’بڑا جرم‘‘ ہے۔ ٹھاکرے نے نامہ نگاروں سے بات کرتے ہوئے کہا ’’بی جے پی اور بل کی حمایت کرنے والے اس کے اتحادیوں نے مسلم کمیونٹی کے بارے میں جو تشویش ظاہر کی ہے وہ (پاکستان کے بانی محمد علی) جناح کو بھی شرمندہ کر دے گی۔‘‘

دریں اثنا مہاراشٹر کے سابق وزیر اعلیٰ ٹھاکرے نے مزید کہا کہ ’’آپ کی نظر وقف اراضی پر ہے، لیکن مندروں کے ٹرسٹوں، گرجا گھروں، گوردواروں کے پاس بھی زمین ہے۔ ہو سکتا ہے آپ کی نظر ہم (ہندو مندروں کی زمینوں) پر بھی ہو۔ یہ بل صرف زمین کے لیے لایا گیا ہے۔ ہم نے اسی افسوسناک بات کی مخالفت کی ہے۔‘‘

وقف بل کا ہندوتوا سے کیا تعلق؟ ٹھاکرے نے کیا سوال

ان کا یہ تبصرہ ایسے وقت آیا ہے جب شندے کی قیادت میں بی جے پی اور شیوسینا نے وقف ترمیمی بل کی حمایت نہ کرنے پر ادھو ٹھاکرے کو گھیرتے ہوئے کہا ہے کہ شیو سینا (یو بی ٹی) نے ہندوتوا اور پارٹی کے بانی بال ٹھاکرے کے نظریات کو ’’چھوڑ دیا‘‘ ہے۔ ان الزامات کا جواب دیتے ہوئے ٹھاکرے نے سوال کیا کہ ’’اگر وقف بل مسلم کمیونٹی کی بہتری کے لیے ہے، تو پھر یہ بل لا کر کس نے ہندوتوا کو چھوڑا ہے؟ وقف ترمیمی بل کا ہندوتوا سے کیا تعلق ہے؟ ہندوؤں کو اس سے کس طرح فائدہ ہوگا؟‘‘ تاہم ٹھاکرے نے یہ بھی کہا کہ ’’بل میں کچھ اچھے ضابطے بھی ہیں۔ ان کی پارٹی منفی سیاست کی حمایت نہیں کرے گی۔ شفافیت ہونی چاہیے۔‘‘