Jammu Kashmir G20 Meet: جی 20 اجلاس جموں و کشمیر کے 1.30 کروڑ لوگوں کیلئے ثقافت اور روایت کو ظاہر کرنے کا بہترین موقع-ایل جی منوج سنہا

Jammu Kashmir G20 Meet: جموں کشمیر میں جی 20 کا اجلاس شروع ہوچکا ہے ۔ اس موقع سے جموں کشمیر کےلیفٹیننٹ گورنر منوج سنہا نے آج اس اعتماد کا اظہار کیا کہ سری نگر میں جی 20 میٹنگ کے ساتھ ہی جموں و کشمیر میں بین الاقوامی سیاحوں کی آمد میں اضافہ ہوگا اور سیاحت اور مہمان نوازی کی صنعت سے عام آدمی کو بہت فائدہ پہنچے گا  اور ان کی آمدنی میں اضافہ ہوگا۔ایل جی منوج سنہا آج اپنے ماہانہ پروگرام”عوام کی آواز کے تحت ریڈیو سے خطاب کر رہے تھے۔ اپنے خطاب میں انہوں نے کہا کہ امرت کال میں ایک نیا جموں و کشمیر امن اور خوشحالی کے ساتھ ابھرے گا۔

انہوں نے کہا کہ جی 20 اجلاس جموں و کشمیر کے 1.30 کروڑ لوگوں کے لیے ثقافت اور روایت کو ظاہر کرنے کا بہترین موقع ہے۔ یہ محض ایک سرکاری پروگرام نہیں ہے بلکہ یونین ٹیریٹری کے شہریوں کا پروگرام ہے۔ اس کی کامیابی سے ہم دنیا کو بتا سکتے ہیں کہ جموں و کشمیر نئی بلندیوں کو چھو رہا ہے۔

اس بات کی نشاندہی کرتے ہوئے کہ جموں و کشمیر میں اشیاء اور خدمات ٹیکس (جی ایس ٹی) کی وصولی میں 40 فیصد اضافہ ہوا ہے، لیفٹیننٹ گورنر نے کہا کہ نئی سڑکیں، سرنگیں، انڈسٹریل اسٹیٹس، مالز، ہسپتال، میڈیکل کالج اور ہائیڈرو پاور پراجیکٹس  مسلسل یوٹی میں لگ رہے ہیں۔انہوں نے لوگوں سے خطاب کرتے ہوئے کہا کہ جی 20 پروگرام کو کامیاب بنانے کی ذمہ داری آپ کے کندھوں پر ہے۔

سنہا نے کہا کہ دہائیوں کے بعد انہیں دنیا کو اپنی ترقی دکھانے کا موقع ملا ہے۔انہوں نے کہا کہ دنیا کی کل آبادی کا 60 فیصد جی 20 ممالک میں رہتا ہے، جو عالمی جی ڈی پی میں 85 فیصد کا حصہ ڈالتے ہیں۔جی 20مالک عالمی تجارت کا 75 فیصد احاطہ کرتے ہیں۔ اس کے پیش نظر انہوں نے کہا کہ جموں و کشمیر کے ہینڈ لوم اور دستکاری مصنوعات کو وسیع عالمی منڈی مل سکتی ہے۔ اس سے جموں و کشمیر کی معیشت کو بھی فروغ ملے گا۔ اس بات پر زور دیتے ہوئے کہ مرکز کے زیر انتظام علاقوں میں بہت سے تعلیمی اداروں کے ذریعہ یوتھ 20میٹنگیں بھی منعقد کی گئیں، لیفٹیننٹ گورنر نے کہا کہ انہیں یقین ہے کہ جی 20 کی شکل میں تاریخی موقع جموں و کشمیر کی آنے والی نسلوں کی حوصلہ افزائی کرے گا۔

بھارت ایکسپریس۔