Ramesh Bidhuri Controversy Row: راہل گاندھی نے دانش علی سے کی ملاقات، گلے لگاتے ہوئے کہا- ”نفرت کے بازار میں محبت کی دوکان“

Rahul Gandhi Meets Danish Ali: کانگریس رکن پارلیمنٹ راہل گاندھی نے جمعہ کے روز (21 ستمبر) کو بی ایس پی رکن پارلیمنٹ کنور دانش علی سے ان کی رہائش گاہ پرملاقات کی۔ کانگریس نے ایکس (ٹوئٹر) پر دونوں لیڈران کی ملاقات کی تصویر شیئر کی ہے۔ راہل گاندھی نے بھی اپنے ایکس (ٹوئٹر) ہینڈل سے تصویر شیئر کرتے ہوئے لکھا کہ نفرت کے بازار میں محبت کی دوکان۔

کانگریس نے ایکس (ٹوئٹر) پر پوسٹ کرکے لکھا، “راہل گاندھی بی ایس رکن پارلیمنٹ دانش علی سے ملنے ان کی رہائش گاہ پر پہنچے۔ کل پورے پارلیمنٹ میں بی جے پی رکن پارلیمنٹ رمیش بدھوڑی نے دانش علی کی توہین کی تھی۔ انہیں بے حد قابل اعتراض الفاظ کہتے تھے اور بی جے پی کے دو سابق وزیر بھدے طریقے سے ہنستے رہے۔”

کانگریس نے مزید لکھا، “رمیش بدھوڑی کی یہ شرمناک اوراوچھی حرکت ایوان کے وقار پر دھبہ ہے۔ کانگریس پورے ملک کے ساتھ جمہوریت کی مندر میں نفرت کی ایسی ذہنیت کے سخت خلاف ہے۔“

راہل گاندھی سے ملاقات کے بعد بی ایس پی رکن پارلیمنٹ کنور دانش علی نے کہا کہ وہ میری ہمت بڑھانے اور حمایت کرنے کیلئے یہاں آئے۔ انہوں نے کہا کہ میں اکیلا نہیں ہوں اور جو لوگ بھی جمہوریت کے حق میں کھڑے ہیں ،وہ میرے ساتھ کھڑے ہیں۔

بتادیں کہ بہوجن سماج پارٹی (بی ایس پی) کے رکن پارلیمنٹ اورسینئرمسلم لیڈر کنوردانش علی بی جے پی رکن پارلیمنٹ رمیش بدھوڑی کے نازیبا اور متنازعہ تبصرہ سے انتہائی بدظن ہیں۔ دانش علی اس قدر بد ظن ہوگئے ہیں کہ وہ پارلیمنٹ تک چھوڑنے پرغورکر رہے ہیں۔ انہوں نے لوک سبھا اسپیکر اوم برلا کو خط لکھا ہے۔ انہوں نے اپنے خط میں لکھا ہے کہ ضابطہ 227 کے تحت معاملے کو خصوصی استحقاق کمیٹی (پریویلیج کمیٹی) کو بھیجا جائے۔ دانش علی نے کہا ہے کہ اگرلوک سبھا اسپیکراوم برلا کی طرف سے سخت کارروائی نہیں کی جاتی ہے تو وہ بھاری دل سے پارلیمنٹ چھوڑنے پرغورکرسکتے ہیں۔

بھارت ایکسپریس۔