Central Government stopped the sale of rice and wheat: Congress: کرناٹک میں بی جے پی کی شکست کے بعد حکومت نے چاول اور گندم کی فروخت بند کردی، کانگریس کا بی جے پر بڑا الزام

نئی دہلی: کانگریس نے اوپن مارکیٹ سیل اسکیم (او ایم ایس ایس) کے تحت مرکزی پول سے ریاستی حکومتوں کو چاول اور گیہوں کی فروخت  بند کیے جانے کے متعلق بدھ کے روز ایک بار پھر بھارتیہ جنتا پارٹی کو تنقید کا نشانہ بنایا اور الزام لگایا کہ کرناٹک کی عوام کی جانب سے شکست کھانے کے بعد مرکزی حکومت نے یہ قدم اٹھایا ہے۔

وہیں پارٹی کے جنرل سکریٹری جے رام رمیش نے یہ بھی کہا کہ فوڈ سیکورٹی کو ہمیشہ اہمیت اور فوقیت دینی چاہئے۔ انہوں نے ٹویٹ کیا، “وزیر اعظم نریندر مودی کی غریب مخالف اور انتقامی سیاست کی حالیہ تاریخ: 13 مئی 2023 کو، وزیر اعظم اور بی جے پی کو کرناٹک کی عوام نے مکمل طور پر مسترد کر دیا۔ دوسری طرف 2 جون 2023 کو کرناٹک کے وزیر اعلیٰ سدارامیا نے ‘انا بھاگیہ’ گارنٹی کے نفاذ کا اعلان کیا، جس کے تحت 1 جولائی سے ہر غریب خاندان کو 10 کلو مفت اناج دیا جانا ہے۔

رمیش نے دعویٰ کیا، “13 جون 2023 کو مرکزی حکومت نے ایک سرکلرجاری کرکے ایف سی آئی سے او ایم ایس اسکیم کے تحت ریاستوں کو چاول کی فروخت پر پابندی لگا دی۔ کرناٹک ایف سی آئی کو 3400 روپے فی کوئنٹل کی شرح سے قیمت ادا کرنے کے لیے تیار ہے۔ لیکن فروخت بند کر دی گئی۔” کانگریس لیڈر نے کہا، “غذائی تحفظ کو ہمیشہ سب سے زیادہ اہمیت دینی چاہیے۔

بتا دیں کہ مرکز نے حال ہی میں اوپن مارکیٹ سیل اسکیم (OMSS) کے تحت مرکزی پول سے ریاستی حکومتوں کو چاول اور گیہوں کی فروخت روک دی ہے۔ فوڈ کارپوریشن آف انڈیا (ایف سی آئی) کے جاری کردہ ایک حکم کے مطابق، “ریاستی حکومتوں کو او ایم ایس ایس (گھریلو) کے تحت گیہوں اور چاول کی فروخت بند کر دی گئی ہے۔”

تاہم، اس میں کہا گیا ہے کہ او ایم ایس ایس کے تحت چاول کی فروخت شمال مشرقی ریاستوں، پہاڑی ریاستوں اور نظم و نسق کی صورتحال اور قدرتی آفات کا سامنا کر رہے ریاستوں کے لیے 3,400 روپے فی کوئنٹل کی موجودہ قیمت پر جاری رہے گی۔

بھارت ایکسپریس۔