Explosion in Balochistan: پاکستان کے صوبہ بلوچستان میں دھماکہ، ایک شخص ہلاک، 14 زخمی

اسلام آباد: پاکستان کے شورش زدہ صوبہ بلوچستان میں ایک بم دھماکے میں ایک شخص ہلاک اور 14 دیگر زخمی ہو گئے۔ حکام نے ہفتہ کے روز یہ جانکاری دی۔ انہوں نے کہا کہ ماری پٹرولیم کمپنی کی ٹیم ضلع ہرنائی کے علاقے میں گیس کی تلاش کے لیے سروے کر رہی تھی تبھی دیسی ساختہ بم (آئی ای ڈی) دھماکہ ہوا۔ ہرنائی کے ڈپٹی کمشنر جاوید ڈومکی نے دھماکے کی تصدیق کرتے ہوئے کہا کہ واقعے میں ایک شخص جاں بحق اور 14 زخمی ہوئے۔

حملے کی ذمہ داری فوری طور پر کسی نے قبول نہیں کی ہے لیکن بلوچ شدت پسند صوبے میں جاری نسلی تنازعہ کی وجہ سے اکثر سرکاری تنصیبات کو نشانہ بناتے رہتے ہیں۔ بلوچ عسکریت پسند وفاقی حکومت پر صوبے کی معدنی دولت سے فائدہ اٹھانے کا الزام لگاتے ہیں۔ وزیراعلیٰ بلوچستان سرفراز احمد بگٹی نے حملے کی شدید مذمت کرتے ہوئے اسے دہشت گردوں کی بزدلانہ حرکت قرار دیا۔ انہوں نے مزید کہا کہ بلوچستان کی عوام اور سیکورٹی فورسز امن کے دشمنوں کے خلاف متحد ہیں جو عوام کو خوفزدہ کرنا چاہتے ہیں۔ بگٹی نے صوبائی محکمہ داخلہ سے ایم پی سی ایل کے عملے کے ارکان پر حملے کے بارے میں انکوائری رپورٹ کا حکم دیا اور زخمیوں کو معیاری طبی امداد فراہم کرنے کی ہدایت کی۔

پاکستان کی سب سے بڑی پٹرولیم کمپنی MPCL کو 2001 میں مرکزی حکومت نے ملک بھر میں تیل اور گیس کے ذخائر کی تلاش کا لائسنس دیا تھا۔ اس سال کے شروع میں فروری میں، اس نے ہرنائی ضلع سے ملحقہ بلوچستان کے ضلع کوہلو میں انتہائی امید افزا ہائیڈرو کاربن کی دریافت کا اعلان کیا تھا۔ بتا دیں کہ یہ علاقہ بلوچ علیحدگی پسندوں کا گڑھ رہا ہے جو اکثر اس خطے میں تزویراتی منصوبوں پر کام کرنے والے سیکورٹی فورسز اور مزدوروں کو نشانہ بناتے رہتے ہیں۔

یہ بھی پڑھیں: پاکستانی عدلیہ میں انٹیلی جنس ایجنسیوں کی مداخلت کے الزامات کی تحقیقات کیلئے بنے گا کمیشن، سپریم کورٹ کے سابق چیف جسٹس کی سربراہی میں ہوگی جانچ

واضح رہے کہ پاکستان نے حالیہ مہینے میں بلوچستان اور خیبر پختونخواہ صوبوں میں سیکورٹی فورسز اور غیر ملکی کارکنوں کے خلاف حملوں میں اضافہ دیکھا ہے۔ اس ہفتے کے شروع میں ملک کے شمال مغربی صوبہ خیبر پختونخواہ میں ایک ہائیڈرو الیکٹرک پراجیکٹ پر کام کرنے والے پانچ چینی انجینئرز ایک خودکش حملے میں ہلاک ہو گئے تھے۔

بھارت ایکسپریس۔