IPL 2025: آئی پی ایل 2025 شروع ہونے سے پہلے بی سی سی آئی نے نافذ کیا نیا ضابطہ، جانئے گیند باز یا بلے باز کس کو ہوگا فائدہ؟

IPL 2025: آئی پی ایل کا سیزن 22 مارچ سے شروع ہو رہا ہے۔ اس سے پہلے ہندوستانی کرکٹ کنٹرول بورڈ (بی سی سی آئی) نے ایک بڑا فیصلہ کیا ہے۔ بورڈ نے لار(تھوک) کے استعمال پرپابندی ہٹانے اورمیچ کی دوسری اننگ میں دوسری گیند کے استعمال کا نیا ضابطہ نافذ کرنے کا فیصلہ کیا ہے۔ یہ تبدیلی آئندہ انڈین پریمیئرلیگ (آئی پی ایل) سیزن میں نافذ ہوجائے گی۔

کپتان اورٹیم منیجرکے ساتھ میٹنگ ہوئی

کرک بزکی رپورٹ کے مطابق، جمعرات (20 مارچ) کو ممبئی کے کرکٹ سینٹرمیں کپتانوں اورٹیم منیجرکی میٹنگ کے دوران ان نئے ضوابط کا اعلان کیا گیا۔ نئے ضوابط کے مطابق، آئی پی ایل میچوں میں دوسری گیند کا استعمال دوسری اننگ کے 11ویں اوور کے بعد کیا جائے گا۔ اس ضابطہ کا اہم مقصد شبنم  (اوس) کے اثرکو کم کرنا ہے، جوعام طورپر رات کے وقت کھیلے جانے والے میچوں کو متاثرکرتا ہے۔ دوسری گیند کے استعمال سے ٹاس جیتنے والی ٹیم کو ملنے والے ممکنہ فوائد کو کم کیا جائے گا، جس سے کھیل کو زیادہ متوازن اور غیرجانبدار بنایا جا سکے گا۔

تھوک کے استعمال سے پابندی بھی ہٹائی لی گئی

اس کے علاوہ، بی سی سی آئی نے تھوک کے استعمال پر لگی پابندی بھی ہٹا دی ہے۔ یہ فیصلہ طویل عرصے سے زیر التواء تھا، خاص طور پرجب تیز گیند باز محمد شمی نے اس ضابطے کوختم کرنے کی اپیل کی۔ محمد شمی نے حال ہی میں دبئی میں کھیلے گئے چیمپئنز ٹرافی کے میچ کے بعد حکام سے درخواست کی تھی کہ گیند کوسوئنگ اورریورس سوئنگ کے لیے تھوک کے استعمال کی اجازت دی جائے۔ ان کے اس مطالبے کی ورنن فلینڈراورٹم ساؤتھی جیسے بین الاقوامی کرکٹروں نے بھی حمایت کی۔

تھوک کے استعمال پر پابندی کووڈ-19 وبائی مرض کے دوران لگائی گئی تھی، جب انٹرنیشنل کرکٹ کونسل (آئی سی سی) نے وائرس کے پھیلاؤ کوروکنے کے لیے فیصلہ کیا تھا۔ تاہم اب جب کہ وبائی مرض کا خطرہ ٹل گیا ہے، اس پابندی کوہٹانے کا مطالبہ مسلسل بڑھتا جا رہا تھا۔ محمد شمی اس تبدیلی کا مطالبہ کرنے والی سب سے نمایاں آوازوں میں سے ایک ہیں، جنہوں نے عالمی کرکٹ میں اس اصول میں ترمیم کی وکالت کی تھی۔