India vs South Africa: دوسرے دن کے کھیل کے اختتام تک بھارت نے بغیر کوئی وکٹ گنوائے 9 رنز بنائے، سیریز 1-1 سے برابر کرنے کا چیلنج درپیش

جنوبی افریقہ نے بھارت کے خلاف برساپارا کرکٹ اسٹیڈیم میں جاری دوسرے ٹیسٹ میچ میں مضبوط گرفت قائم کر رکھی ہے۔ جنوبی افریقہ نے اپنی پہلی اننگز میں 489 رنز بنائے۔ اس کے جواب میں ٹیم انڈیا نے دوسرے دن کے اختتام تک بغیر کوئی وکٹ گنوائے 9 رنز بنا لیے ہیں۔ اس وقت بھارت جنوبی افریقہ سے 480 رنز پیچھے ہے۔ جنوبی افریقہ نے ٹاس جیت کر پہلے بیٹنگ کا فیصلہ کیا۔ اوپننگ جوڑی نے مہمان ٹیم کو بہترین شروعات دلائی۔ ایڈن مارکرم اور ریان ریکیلٹن نے پہلی وکٹ کے لیے 82 رنز کی شراکت کی۔ پہلے دن کے پہلے سیشن کی آخری گیند پر مارکرم 38 رنز بنا کر آؤٹ ہوئے۔ اگلے سیشن کے آغاز میں ہی ریکیلٹن بھی 35 رنز پر اپنی وکٹ گنوا بیٹھے۔ یہاں سے ٹرسٹن اسٹیبس نے کپتان ٹیمبا باووما کے ساتھ تیسری وکٹ کے لیے 84 رنز جوڑ کر اننگز کو سنبھالا۔ مقابلے کے تیسرے سیشن میں باووما 41 رنز بنا کر آؤٹ ہوئے۔ اسی سیشن میں ٹیم نے اسٹیبس سمیت مزید 4 وکٹیں گنوائیں، اسٹیبس 49 رنز بنا سکے۔جنوبی افریقی ٹیم 246 کے اسکور تک اپنے 6 وکیٹ گنوا  چکی تھی۔ یہاں سے سینورن مستھوسامی نے کائل ویرین کے ساتھ ساتویں وکٹ کے لیے 88 رنز جوڑ کر ٹیم کو سہارا دیا۔ ویرین 45 رنز بنا کر آؤٹ ہوئے۔ اس کے بعد مستھوسامی نے مارکو یانسن کے ساتھ آٹھویں وکٹ کے لیے 97 رنز کی شاندار شراکت قائم کی اور ٹیم کو بڑے اسکور تک پہنچایا۔ مستھوسامی نے 206 گیندوں پر 2 چھکوں اور 10 چوکوں کی مدد سے 109 رنز بنائے، جبکہ یانسن نے 91 گیندوں میں 93 رنز کی اننگز کھیلی۔

کے ایل راہل اور یشسوی جیسوال نے دی اچھی شروعات

بھارت کی جانب سے کلدیپ یادو نے 4 وکٹیں حاصل کیں، جبکہ جسپریت بمراہ، محمد سراج اور رویندر جڈیجہ نے 2-2 وکٹیں لیں۔ جواب میں بھارت نے دوسرے دن کے اختتام تک 6.1 اوورز میں بغیر وکٹ گنوائے 9 رنز بنائے۔ کے ایل راہل 2 اور یشسوی جیسوال 7 رنز پر ناٹ آؤٹ ہیں۔ جنوبی افریقی ٹیم سیریز کا پہلا میچ 30 رنز سے جیت چکی ہے۔ ٹیم انڈیا کی کوشش ہے کہ گوہاٹی ٹیسٹ جیت کر سیریز کو 1-1 سے برابر کیا جائے۔

بھارت ایکسپریس اردو۔