Fastest 50 in IPL: ابھیشیک شرما نے بنائی آئی پی ایل 2024 کی تیز ترین نصف سنچری

راجیو گاندھی انٹرنیشنل اسٹیڈیم میں ممبئی انڈینز اور سن رائزرز حیدرآباد کے درمیان میچ کھیلا جا رہا ہے، جس میں ایس آر ایچ کے بلے بازوں کی دھماکہ خیز اننگز نے کئی ریکارڈ اپنے نام کر لیے ہیں۔ اسی میچ میں ٹریوس ہیڈ نے 18 گیندوں پر نصف سنچری بنائی۔ اس کے ساتھ ہی ہیڈ آئی پی ایل کی تاریخ میں ایس آر ایچ کے لیے تیز ترین ففٹی بنانے والے کھلاڑی بن گئے تھے لیکن چند ہی منٹوں میں 23 سالہ ابھیشیک شرما نے یہ ریکارڈ توڑ دیا۔ انہوں نے چھکے اور چوکے لگاتے ہوئے صرف 16 گیندوں میں نصف سنچری اسکور کی۔ اس میچ میں انہوں نے ٹریوس ہیڈ کے ساتھ صرف 22 گیندوں پر 68 رنز کی شراکت بنا کر ایم آئی کی باؤلنگ کو ناقص ثابت کیا۔

ابھیشیک شرما نے اس میچ میں صرف 23 گیندیں کھیلی جس میں انہوں نے 3 چوکوں اور 7  چھکوں کی مدد سے 63 رنز کی دھماکہ خیز اننگز کھیلی۔ آئی پی ایل 2024 میں اپنے پہلے میچ میں، یعنی کے کے آر کے خلاف، انہوں نے 19 گیندوں میں 32 رنز کی اننگز کھیلی تھی۔ اس سے قبل آئی پی ایل میں حیدرآباد کا کوئی بھی کھلاڑی 20 گیندوں سے کم میں نصف سنچری بنانے میں کامیاب نہیں ہوا تھا لیکن شرما نے یہ کارنامہ صرف 16 گیندوں میں انجام دیا ہے۔ دوسری جانب اس میچ میں آسٹریلوی دھماکہ خیز بلے باز ٹریوس ہیڈ نے 24 گیندوں پر 62 رنز کی زبردست اننگز کھیل کر ممبئی انڈینز کے گیند بازوں کا پسینہ چھڑا دیا۔ ہیڈ نے کوئنا مفاکا کی گیند پر چوکا لگا کر اننگز کا آغاز کیا۔ ٹریوس ہیڈ نے 62 رنز کی اس اننگز میں 9 چوکے اور 3 فلک بوس چھکے بھی لگائے۔

ابھیشیک شرما کا آئی پی ایل کیریئر

ابھیشیک شرما نے 2018 میں اپنا آئی پی ایل ڈیبیو کیا۔ اب تک وہ 49 میچ کھیل چکے ہیں جس میں انہوں نے 975 رنز بنائے ہیں۔ اس مختصر کیریئر میں وہ 5 نصف سنچری اننگز بھی کھیل چکے ہیں۔ وہ آئی پی ایل 2024 میں ایس آر ایچ کے لیے اہم اوپننگ بلے باز کا کردار ادا کر رہے ہیں اور اب تک جس طرح سے ان کے بلے سے رنز آ رہے ہیں، ایسا لگتا ہے کہ وہ آئی پی ایل 2024 میں اورنج کیپ کے مضبوط دعویداروں میں سے ایک ہیں۔