Lok Sabha Election 2024 Schedule: آئین کو آمریت سے بچانے کا آخری موقع،انتخاب سے متعلق تاریخ کے اعلان کے بعد ملکارجن کھرگے کا بیان

لوک سبھا انتخابات 2024 سے متعلق تواریخ  کے اعلان کے بعد کانگریس نے بی جے پی پر اپنے حملوں کو مزید تیز کر دیا ہے۔ کانگریس پارٹی کے قومی صدر ملکارجن کھرگے نے مودی حکومت کو نشانہ بناتے ہوئے کہا کہ 2024 کے لوک سبھا انتخابات ہندوستان کے لیے ‘انصاف کا دروازہ’ کھولیں گے۔

کانگریس صدر کھرگے نے سوشل میڈیا پلیٹ فارم ایکس پر پوسٹ شیئر کرتے ہوئے کہا کہ جمہوریت اور آئین کو آمریت سے بچانے کا شاید یہ آخری موقع ہوگا۔ انہوں نے کہا کہ ہم ‘ہندوستان کے لوگ’ مل کر نفرت، لوٹ مار، بے روزگاری، مہنگائی اور مظالم کے خلاف لڑیں گے۔ حالات  بدلیں گے۔

راہل گاندھی کی نیائے یاترا کا کل آخری دن ہے۔

دوسری طرف کانگریس کی طرف سے نکالی جانے والی راہل گاندھی کی ‘بھارت جوڑو نیائے یاترا’ 17 مارچ 2024 کو اختتام پذیر ہوگی۔ کانگریس کی جانب سے کل اتوار کو ممبئی میں ایک بڑی ریلی بھی نکالی جا رہی ہے جس میں اتحادی ‘انڈیا الائنس’ کے لیڈران بھی شرکت کریں گے۔ اس ریلی میں بڑی تعداد میں لوگوں کی شرکت متوقع ہے۔ اس ریلی کے انعقاد سے عین قبل لوک سبھا انتخابات کی تاریخوں کا اعلان کر دیا گیا ہے۔ اس کے بعد ملک بھر میں ماڈل ضابطہ اخلاق بھی نافذ ہے۔ ایسے میں الیکشن کمیشن بھی اس ریلی پر کڑی نظر رکھے گا۔

انصاف کا میدان پکارتا ہے، ہم تیار ہیں – پون کھیڑا

دوسری طرف کانگریس پارٹی کے سینئر لیڈر پون کھیڑا نے بھی کہا کہ انتخابی بگل بج گیا ہے۔ انصاف کے اس میدان جنگ نے بلایا ہے اور ہم اس کے لئے تیار ہیں۔ یہ انتخاب کسی بھی صورت عام نہیں ہے۔ انتخابات فیصلہ کریں گے کہ ملک مزدوروں اور کسانوں کے کندھوں پر چلے گا یا سرمایہ داروں کے کندھوں پر۔ انہوں نے یہ بھی کہا کہ الیکشن کس پر ہوں گے، بابا صاحب کے آئین پر یا ڈکٹیٹر پر؟ ملک اس الیکشن میں اپنی انا پر کاری ضرب لگانے کے لیے تیار ہے۔ انہوں نے یہ بھی کہا کہ کسانوں اور دلتوں نے راہل گاندھی کی ‘بھارت جوڑو نیا ئےیاترا’ کی حمایت کی ہے۔ وہ ملک کے کونے کونے میں گئے اور لوگوں سے ملے اور لوگ کانگریس اور راہل گاندھی دونوں کو قریب سے سمجھ چکے ہیں۔

آپ کو بتا دیں کہ ملک کی 543 لوک سبھا سیٹوں کی تاریخوں کا اعلان چیف الیکشن کمشنر راجیو کمار نے ہفتہ (16 مارچ) کو کیا تھا۔ ملک میں عام انتخابات 2024 کل 7 مرحلوں میں ہوں گے۔ انتخابات کا پہلا مرحلہ 19 اپریل کو ہوگا اور ساتویں اور آخری مرحلے کے لیے ووٹ یکم جون کو ڈالے جائیں گے۔ ان تمام سیٹوں کے انتخابی نتائج 4 جون کو آئیں گے۔