Pashupati Paras Chirag Paswan tussle: بہار میں چچا بھتیجے نے بی جے پی کی بڑھائی مشکل ، این ڈی اے میں حصہ نہ ملے تو کیا کرں گے پشوپتی پارس ؟

ملک میں لوک سبھا انتخابات  2024  سے متعلق تواریخ کا اعلان ہوگیا ہے۔  حزب اختلاف کے متحدہ محاذ(انڈیا اتحاد) اور این ڈی اے اتحاد تمام ریاستوں میں سیٹوں کی تقسیم اور امیدواروں کے ناموں کو حتمی شکل دینے میں مصروف ہے۔ بہار این ڈی اے میں نشستوں کی تقسیم کے بعد تنازعات منظر عام پر آنے لگے ہیں ۔ تاہم سیٹوں کی تقسیم کے حوالے سے ابھی تک کوئی اعلان نہیں کیا گیا ہے۔ ادھر لوک جن شکتی پارٹی کے صدر پشوپتی پارس سیاسی میدان میں اپنی الگ تال ٹھوک رہے ہیں۔ پارس اب بھی یہ مان رہے ہیں کہ بی جے پی انہیں اتحاد میں نظر انداز نہیں کرے گی، اور انہیں مناسب نشستیں دیں گی۔ وہیں پارٹی صدر جے پی نڈا اور امیت شاہ سے ملاقات کے بعد چراغ نے کہا ہے کہ این ڈی اے میں سب کچھ ٹھیک ہے۔

بہار کے سیاسی ماہرین کے مطابق اگر پشوپتی پارس کی ایل جے پی کو این ڈی اے میں سیٹیں نہیں ملتی ہیں تو وہ 3 ممکنہ اقدامات کر سکتے ہیں۔ پہلا امکان یہ ہے کہ پشوپتی پارس عظیم اتحاد میں شامل ہو سکتے ہیں۔ تاہم، پشوپتی کو ابھی تک  عظیم اتحاد  کی طرف سے کوئی دعوت نامہ موصول نہیں ہوا ہے۔ تاہم تیجسوی نے چراغ پاسوان کو 8 سیٹوں پر الیکشن لڑنے کی پیشکش کی تھی۔ ایسے میں وہ عظیم اتحاد میں شامل ہو سکتے ہیں۔ لیکن اگر آر جے ڈی ذرائع کی مانیں تو جے ڈی یو کے عظیم اتحاد سے الگ ہونے کے بعد سیٹوں کی تقسیم کو حتمی شکل دی گئی ہے۔ بہار کی 40 لوک سبھا سیٹوں میں سے آر جے ڈی 28 سیٹوں پر، کانگریس 9 سیٹوں پر، مالے  2 پر اور سی پی آئی 1 سیٹ پر الیکشن لڑ سکتی ہے۔ وہیں کھگڑیا کے ایم پی محبوب علی قیصر  اور ویشالی ایم پی وینا سنگھ نے چراغ پاسوان  کی پارٹی میں شمولیت اختیار کی ہے۔

بی جے پی کی پشوپتی کو گورنر کی پیشکش

دوسری طرف اگر پشوپتی کو گرینڈ الائنس سے پیشکش نہیں ملتی ہے تو وہ اکیلے الیکشن لڑ سکتے ہیں۔ بالکل اسی طرح جیسے چراغ نے 2020 کے اسمبلی انتخابات میں حصہ لیا تھا۔ ماہرین کی مانیں تو بی جے پی بہار میں سیٹوں کی تقسیم کا فارمولہ پہلے ہی طے کر چکی ہے۔ بی جے پی کو 17 سیٹیں مل سکتی ہیں، جے ڈی یو کو 16 سیٹیں مل سکتی ہیں، ایل جے پی (آر) کو 5 سیٹیں مل سکتی ہیں اور اوپیندر کشواہا اور جیتن رام مانجھی کو ایک ایک سیٹ مل سکتی ہے۔ تاہم، مانجھی اور کشواہا دونوں سیٹوں کی تقسیم سے خوش نہیں ہیں۔ کشواہا جے ڈی یو میں شامل ہونے سے پہلے ہی این ڈی اے میں شامل ہو گئے تھے۔ تب وہ 3 سیٹوں کا دعویٰ کر رہے تھے لیکن جے ڈی یو کے داخلے کے بعد صورتحال بدل گئی ہے۔

معلومات کے مطابق، بی جے پی نے پشوپتی پارس کو گورنر بنانے کی تجویز دی ہے۔ جبکہ پرنس کو بہار حکومت میں وزیر بنایا جا سکتا ہے۔ ایسے میں پشوپتی کے پاس بنیادی طور پر صرف دو ہی راستے رہ گئے ہیں، یا تو وہ فعال سیاست کو خیرٓآباد کہہ دیں اور گورنر بنیں یا پھر انتخابی میدان میں اتریں۔