Ashok Choudhary Removed Tejashwi Yadav Name Slip: تیجسوی کے نام کی پرچی ہٹا دی گئی اور… راج بھون میں ‘ایٹ ہوم’ پروگرام کا ویڈیو وائرل

بہار میں سخت سردی کے درمیان سیاسی گرما گرمی دیکھی جا رہی  ہے۔ قیاس آرائیاں کی جارہی ہیں کہ وزیر اعلی نتیش کمار ایک بار پھر رخ بدل سکتے ہیں۔ آر جے ڈی کے ساتھ نتیش کمار کی بات چیت رک گئی ہے۔ اس وقت دونوں خیموں میں اندرونی طورپر سرگرمیاں جاری ہیں۔ دریں اثنا، آج یوم جمہوریہ کے موقع پر راج بھون میں ایک پروگرام کا انعقاد کیا گیا۔ پروگرام میں جے ڈی یو اور بی جے پی کے سبھی بڑے لیڈر موجود تھے لیکن آر جے ڈی کا کوئی وزیر یا ایم ایل اے نظر نہیں آیا۔

اسی دوران ایک ویڈیو منظر عام پر آئی ہے جسے دیکھ کر آسانی سے اندازہ لگایا جاسکتا ہے کہ دونوں کے درمیان خلیج کتنی گہری ہوگئی ہے۔ ویڈیو میں دیکھا جا سکتا ہے کہ وزیر اعلی نتیش کمار اپنی سیٹ پر بیٹھے ہوئے تھے، جب کہ ان کے ساتھ والی سیٹ خالی تھی۔ تاہم یہ سیٹ نائب وزیر اعلی تیجسوی یادو کے لیے مخصوص تھی۔ لیکن وہ پروگرام میں نہیں آئے۔ ایسے میں وزیر اشوک چودھری وہاں پہنچے، ڈپٹی سی ایم کے نام والی پرچی ہٹائی اور خود بھی وہیں بیٹھ گئے۔ اس پروگرام میں کانگریس کے لیڈروں نے بھی شرکت نہیں کی۔

اس دوران آر جے ڈی بھی آر پار کے موڈ میں دکھائی دے رہی ہے۔ لالو یادو نتیش کمار سے وضاحت چاہتے ہیں کہ نتیش کمار شک کو دور کریں۔ نتیش نے آر جے ڈی لیڈروں سے بات چیت روک دی ہے۔ یہ نتیش کمار کا روایتی انداز رہا ہے، وہ کسی سے تعلقات توڑ لیتے ہیں اور پھر ان سے زیادہ دیر تک بات نہیں کرتے۔ جب انہوں نے اگست 2022 میں این ڈی اے چھوڑا تو انہوں نے ایسا ہی کیا۔