Sanjay Nishad controversial statement : سات داروغہ کا ہاتھ پیر توڑوا کر یہاں تک پہنچا ہوں،اس لئے زیادہ ڈرامہ کروگے تو جیل جاوگے اور ضمانت بھی نہیں ملے گی:سنجے نشاد

اتر پردیش حکومت میں کابینہ کے وزیر اور نشاد پارٹی کے سربراہ سنجے نشاد نے ایک متنازعہ بیان دیا ہے۔ سنجے نشاد اپنی پارٹی کی جن ادھیکار یاترا کے ساتھ سلطان پور پہنچے تھے۔ یہاں انہوں نے پولیس کے حوالے سے ایک متنازعہ بیان دیا۔ انہوں نے کہا کہ میں یہاں  تک اسی طرح نہیں پہنچا  ہوں بلکہ 7 داروغہ کے ہاتھ پیر توڑ کر گڑھے میں پھینک کر یہاں پہنچا ہوں۔سنجے نشاد نے کہا کہ اگر نشاد برادری کے کسی فرد کو فرضی کیس میں پھنسایا جاتا ہے تو ہم اسے برداشت نہیں کریں گے۔ انہوں نے کہا کہ ہماری برادری کے بہت سے لوگوں کو جھوٹے مقدمات میں پھنسایا گیا ہے۔ سنجے نشاد نے پولیس سے کہا کہ ہمارے لڑکوں کے خلاف تمام فرضی مقدمات کو ہٹا دیں، ورنہ احتجاج کیا جائے گا اور انسپکٹر کو معطل کر دیا جائے گا۔ انہوں نے کہا کہ میں وزیراعلیٰ سے بھی شکایت کروں گا، میں یہاں ایسے ہی نہیں آیا ہوں۔ میں سات پولیس انسپکٹرز کے ہاتھ پیر توڑ کر یہاں پہنچا ہوں۔

سنجے نشاد نے کہا کہ اگر ہمارے سماج کے کسی فرد کو پھنسایا گیا تو ہم اسے برداشت نہیں کریں گے۔ انہوں  نے کہا داروغہ اگر زیادہ ڈرامہ کرے تو وہ جیل جائے گا اور ضمانت بھی نہیں ملے گی۔ انہوں نے کہا کہ اگر ضرورت پڑی تو داروغہ کے خلاف مزید سخت کارروائی کی جائے گی۔ سنجے نشاد نے یہ بیان سلطان پور کے چندا علاقے کے گاؤں مدارڈیہ میں دیا۔

آپ کو بتا دیں کہ سلطان پور میں 14 مارچ کو ہولی کے دن ایک واقعہ پیش آیا تھا۔ یہاں رنگوں کی ہولی کے دوران ایک دلت اور نشاد خاندان کے درمیان جھگڑا ہو گیا۔ اس دوران دونوں خاندانوں میں لڑائی ہوئی اور دلت خاندان کے کہنے پر شاہ پور گاؤں کے سربراہ سمیت پانچ افراد کے خلاف مقدمہ درج کیا گیا۔اس میں سے پردھان سمیت چار لوگوں کو جیل بھیج دیا گیا۔ جب نشاد کے خاندان نے سنجے نشاد سے اس کی شکایت کی تو انہوں نے سی او اور دیگر افسران کو ہدایات دیں۔ سنجے نشاد کا کہنا ہے کہ جن لوگوں کو گرفتار کیا گیا ہے وہ بے قصور ہیں اور انہیں رہا کیا جائے، ورنہ ان کے خلاف کارروائی کی جائے گی۔

بھارت ایکسپریس۔