Priyank Mallikarjun Kharge: رام مندر چندہ چوری معاملہ پر پرینک کھڑگے کا وزیر اعظم مودی پر حملہ، بولے- اس پر من کی بات کب کریں گے؟

نئی دہلی :ایودھیا کے رام مندر میں چندے کی مبینہ چوری کے معاملے پر اپوزیشن مسلسل مرکزی حکومت اور اتر پردیش کی یوگی آدتیہ ناتھ حکومت کو نشانہ بنا رہی ہے۔ اسی سلسلے میں کانگریس صدر ملکارجن کھڑگے کے بیٹے اور کرناٹک حکومت کے وزیر پرینک کھڑگے نے وزیر اعظم نریندرمودی پرسخت تنقید کی ہے۔بنگلورو میں ہفتہ 27 جون کو صحافیوں سے گفتگو کرتے ہوئے پرینک کھڑگے نے انڈیا اتحاد (INDIA Alliance) کا ذکر کرتے ہوئے بی جے پی پر سنگین الزامات عائد کیے۔ انہوں نے کہا کہ رام مندر میں پران پرتِشٹھا بھی وزیر اعظم مودی نے کی تھی اور افتتاح بھی انہی کے ہاتھوں ہوا تھا، لیکن اب جب چندے کی چوری کا معاملہ سامنے آیا ہے تو وزیر اعظم اس پر اپنی خاموشی کب توڑیں گے؟ انہوں نے سوال کیا، “وزیر اعظم اس معاملے پر ‘من کی بات’ کب کریں گے؟”

یوگی آدتیہ ناتھ پر بھی سوالات

پرینک کھڑگے نے اتر پردیش کے وزیراعلیٰ یوگی آدتیہ ناتھ کو بھی تنقید کا نشانہ بنایا۔ انہوں نے کہا کہ یوگی آدتیہ ناتھ کہہ رہے ہیں کہ رام بھکتوں کے جذبات سے کھیل نہ کیا جائے، لیکن سوال یہ ہے کہ ان جذبات سے کھیلنے والا کون ہے؟انہوں نے کہا، “کیا کانگریس، سماجوادی پارٹی یا اپوزیشن کی کسی جماعت کا کوئی رہنما اس معاملے میں ملوث ہے؟ نہیں، اس میں آپ ہی کے لوگ شامل ہیں۔”

‘عوام کے عقیدے کی حفاظت میں ناکام رہے’

بی جے پی پر حملہ کرتے ہوئے پرینک کھڑگے نے کہا کہ حکومت عوام کے مذہبی عقیدے اور اعتماد کی حفاظت کرنے میں ناکام رہی ہے۔ انہوں نے الزام لگایا کہ یہی وہ لوگ ہیں جنہوں نے رام کے نام پر لوٹ کھسوٹ کی اور مذہب کو سیاست کے لیے استعمال کیا۔ ان کے مطابق ایسے لوگوں سے کسی مثبت اقدام کی امید نہیں کی جا سکتی۔

معاملے میں کارروائی جاری

رام مندر چندہ چوری کا معاملہ ملک بھر میں موضوعِ بحث بنا ہوا ہے۔ حکام کی جانب سے اس کیس میں مسلسل کارروائی کی جا رہی ہے اور اب تک آٹھ افراد کو گرفتار کیا جا چکا ہے۔اسی تنازع کے بعد رام مندر تیرتھ شیترا ٹرسٹ کے جنرل سیکریٹری چمپت رائے اور ٹرسٹی ڈاکٹر انیل مشرا نے اخلاقی ذمہ داری قبول کرتے ہوئے اپنے عہدوں سے استعفیٰ دے دیا ہے۔

بھارت ایکسپریس اردو