Noida Sector 39 Police Bust Theft Gang: نوئیڈا سیکٹر 39 تھانہ پولیس نے موبائل اور گاڑی چور گروہ کے تین افراد کو کیا گرفتار، 13 موبائل فون اور موٹرسائیکل برآمد

سیکٹر 39 تھانہ پولیس نے موبائل فون اور گاڑی چوری کرنے والے تین رکنی گروہ کو گرفتار کر لیا ہے۔ یہ کارروائی سیکٹر 43 میں اسٹیلر گرین پارک کے پیچھے سنسان سڑک پر انجام دی گئی۔ گرفتار افراد کے قبضے سے 13 اینڈرائیڈ موبائل فون اور ایک ہیرو اسپلنڈر موٹرسائیکل برآمد کی گئی، جو وارداتوں میں استعمال ہوتی تھی۔ گرفتار ملزمان کی شناخت آشُو کنوجیا (عمر 19)، شیو عرف راجو عرف گوتم (24) اور ابھشیک (23) کے طور پر ہوئی ہے، جن کا تعلق بالترتیب ہردوئی، بلندشہر اور مرادآباد سے ہے۔ یہ تینوں فی الحال نوئیڈا کے سیکٹر 45 میں کرائے کے مکانوں میں رہائش پذیر تھے۔

پولیس کے مطابق ملزمان موٹرسائیکل پر سوار ہو کر سنسان راستوں اور بس اڈوں جیسے رش والے علاقوں میں لوگوں کے ہاتھ سے موبائل فون چھین لیتے تھے یا چوری کرتے تھے۔ چوری شدہ موبائل فون دہلی کے چور بازار میں فروخت کیے جاتے تھے اور حاصل شدہ رقم کو نشے کی لت پوری کرنے کے لیے استعمال کیا جاتا تھا۔ گرفتار ملزمان کے خلاف مقدمہ نمبر 395/2025 دفعہ 305-A، 317(2)، 317(5) بی این ایس کے تحت درج کیا گیا ہے۔ واردات میں استعمال شدہ موٹرسائیکل اور برآمد شدہ موبائل فون بطور ثبوت پولیس نے اپنے قبضے میں لے لیے ہیں۔

پولیس کے مطابق یہ تینوں ملزمان مل کر چوری و چھینا جھپٹی کی متعدد وارداتوں میں ملوث رہے ہیں اور ان کے دیگر ساتھیوں کی تلاش جاری ہے۔ پولیس کا کہنا ہے کہ علاقے میں عوام کے تحفظ اور جرائم پر قابو پانے کے لیے ایسے عناصر کے خلاف مزید سخت کارروائیاں جاری رہیں گی۔ واضح رہے کہ اس سے قبل سیکٹر 39 تھانہ پولیس نے ایک انکاؤنٹر کے بعد موبائل ٹاورز سے قیمتی آلات چوری کرنے والے گروہ کے آٹھ ملزمان کو مقابلے کے بعد گرفتار کر لیا اور ان کے قبضے سے 4 ریڈیو ریسیور یونٹس، 2 بنڈل کیبل، 1 ڈی سی ڈی بی باکس (انڈس ٹاور لمیٹڈ)، 2 ہنڈائی کاریں (ایک بغیر نمبر پلیٹ کی) اور متعدد اوزار برآمد کیے۔

بھارت ایکسپریس اردو