AI Impact Summit: فرانسیسی صدر ایمینویل میخوں کریں گے بھارت کا دورہ، وزیراعظم نریندر مودی سے ہوگی دوطرفہ امور پراعلیٰ سطحی بات چیت

نئی دہلی: فرانس کے صدر ایمینویل میخوں وزیراعظم نریندر مودی کی دعوت پر 17 سے 19 فروری تک بھارت کا چوتھا سرکاری دورہ کریں گے۔ اس دورے میں وہ انڈیا اے آئی امپیکٹ سمٹ میں شرکت کے علاوہ دوطرفہ امور پر اعلیٰ سطحی بات چیت کریں گے، جس سے بھارت۔فرانس اسٹریٹجک شراکت داری میں تسلسل اور وسعت کا پیغام ملتا ہے۔ صدر ایمینویل میخوں نئی دہلی میں 16 تا 20 فروری منعقد ہونے والی انڈیا اے آئی امپیکٹ سمٹ میں شریک ہوں گے، جو بھارت منڈپم میں منعقد ہوگی۔ یہ عالمی جنوب میں ہونے والی پہلی عالمی اے آئی سمٹ ہوگی، جس میں عالمی رہنما، پالیسی ساز، ٹیکنالوجی کمپنیاں اور ماہرین مصنوعی ذہانت شرکت کریں گے۔ سمٹ ’’پیپل، پلانیٹ اور پروگریس‘‘ کے تین ستونوں پر مرکوز ہوگی اور اے آئی گورننس، اختراع اور پائیدار ترقی پر تبادلۂ خیال کیا جائے گا۔ بھارتی وزارت خارجہ کے مطابق، وزیراعظم مودی اور صدر ایمینویل میخوں دوطرفہ تعاون کو مزید مستحکم بنانے پر بات کریں گے، جو طویل مدتی اسٹریٹجک وژن کا خاکہ پیش کرتا ہے۔ دونوں رہنما ممبئی میں مشترکہ طور پر ’’بھارت۔فرانس سال اختراع 2026‘‘ کا افتتاح بھی کریں گے، جس کا مقصد ٹیکنالوجی، تحقیق اور عوامی روابط کے شعبوں میں اشتراک کو فروغ دینا ہے۔

دفاع، خلائی اور جوہری توانائی میں شراکت داری

بھارت اور فرانس کے تعلقات 26 جنوری 1998 کو قائم ہونے والی اسٹریٹجک شراکت داری سے مضبوط بنیادوں پر استوار ہیں۔ دفاع و سلامتی، سویلین جوہری توانائی اور خلائی تعاون اس شراکت کے بنیادی ستون ہیں، جب کہ حالیہ برسوں میں انڈو پیسیفک خطے میں تعاون بھی نمایاں طور پر بڑھا ہے۔ صدر ایمینویل میخوں کا پہلا دورہ 2018 میں ہوا جسے دوطرفہ تعلقات میں نئے باب کا آغاز قرار دیا گیا۔ وہ 2023 میں جی-20 سربراہی اجلاس میں شرکت کے لیے بھارت آئے، جب کہ 2024 میں یوم جمہوریہ کی 75ویں تقریبات میں مہمانِ خصوصی تھے۔ فروری 2025 میں وزیرِ اعظم مودی نے پیرس میں صدر میخوں کے ہمراہ اے آئی ایکشن سمٹ کی مشترکہ صدارت بھی کی تھی۔ وزارت خارجہ کے بیان کے مطابق یہ دورہ دونوں ممالک کے درمیان باہمی اعتماد اور گہری اسٹریٹجک ہم آہنگی کی عکاسی کرتا ہے، خصوصاً ابھرتی اور اہم ٹیکنالوجیز جیسے مصنوعی ذہانت کے میدان میں تعاون کو نئی جہت دینے کے لیے۔

اے آئی ایکسپو اور عوامی شمولیت

انڈیا اے آئی امپیکٹ ایکسپومیں 30 ممالک کے 300 سے زائد نمائش کنندگان شرکت کریں گے۔ نمائش میں صحت، زراعت، تعلیم، موسمیاتی تبدیلی اور توانائی کے شعبوں میں اے آئی کے عملی اطلاق کو پیش کیا جائے گا۔ یہ سمٹ انڈیا اے آئی مشن اور ڈیجیٹل انڈیا اقدام سے ہم آہنگ ہے اور عالمی مباحث کو عوامی فلاح کے عملی نتائج میں تبدیل کرنے پر زور دیتی ہے۔

بھارت ایکسپریس اردو۔