نئی دہلی: سابق آئی اے ایس افسر راج کمار گوئل نے پیر، 15 دسمبر کو ملک کے نئے چیف انفارمیشن کمشنر کے طور پر اپنے عہدے کا حلف اٹھا لیا۔ صدر جمہوریہ دروپدی مرمو نے انہیں عہدے اور رازداری کا حلف دلایا۔ حکام کے مطابق، وزیر اعظم نریندر مودی کی قیادت والی تین رکنی سلیکشن کمیٹی نے ان کے نام کی سفارش کی تھی۔ واضح رہے کہ چیف انفارمیشن کمشنر کا عہدہ 13 ستمبر 2025 سے خالی تھا، جب سابق سی آئی سی ہیرالال سامریا کی میعاد مکمل ہو گئی تھی۔ تقریباً تین ماہ تک یہ اہم آئینی عہدہ خالی رہنے کے بعد اب مرکزی اطلاع کمیشن کو نیا سربراہ مل گیا ہے۔ راج کمار گوئل کی تقرری سے کمیشن کے کام کاج میں تیزی اور مضبوطی آنے کی امید ظاہر کی جا رہی ہے۔

راج کمار گوئل کا تعارف

راج کمار گوئل 1990 بیچ کے اروناچل پردیش-گوا-میزورم اور مرکز کے زیر انتظام علاقوں (AGMUT) کیڈر کے ریٹائرڈ آئی اے ایس افسر ہیں۔ انہوں نے 31 اگست کو وزارتِ قانون و انصاف کے تحت محکمۂ انصاف میں سیکریٹری کے عہدے سے سبکدوشی اختیار کی تھی۔ اس سے قبل وہ وزارتِ داخلہ میں سیکریٹری (بارڈر مینجمنٹ) کے طور پر بھی خدمات انجام دے چکے ہیں۔اپنے طویل انتظامی کیریئر کے دوران راج کمار گوئل نے مرکزی حکومت کے ساتھ ساتھ سابقہ ریاست جموں و کشمیر میں بھی کئی اہم ذمہ داریاں نبھائیں اور انتظامی امور میں نمایاں تجربہ حاصل کیا۔

کمیشن کو ملی مکمل ٹیم

راج کمار گوئل کے ساتھ ہی آٹھ نئے انفارمیشن کمشنروں کی بھی تقرری کی گئی ہے۔ ان کی حلف برداری کے بعد تقریباً نو سال کے وقفے کے بعد مرکزی اطلاع کمیشن مکمل صلاحیت کے ساتھ کام کرے گا۔ قانون کے مطابق کمیشن میں ایک چیف انفارمیشن کمشنر اور زیادہ سے زیادہ دس انفارمیشن کمشنر ہو سکتے ہیں۔جن ناموں کی تقرری کی سفارش کی گئی ہے، ان میں سابق چیئرپرسن ریلوے بورڈ جیا ورما سنہا، سابق آئی پی ایس افسر سواگت داس، سابق آئی اے ایس افسر سریندر سنگھ مینا، سابق آئی ایف ایس افسر خوشونت سنگھ سیٹھی، سینئر صحافی پی۔ آر۔ رمیش اور آشو توش چترویدی شامل ہیں۔ اس کے علاوہ سدھا رانی ریلنگی اور سنجیو کمار جندل کے نام بھی فہرست میں شامل ہیں۔

وزیر اعظم کی قیادت میں ہوا انتخاب

ان تمام تقرریوں کو وزیر اعظم نریندر مودی کی صدارت میں ہونے والی سلیکشن کمیٹی کی میٹنگ میں منظوری دی گئی۔ اس میٹنگ میں وزیر داخلہ امت شاہ اور لوک سبھا میں قائدِ حزب اختلاف راہل گاندھی بھی شریک تھے۔ ذرائع کے مطابق، راہل گاندھی نے انتخابی عمل سے متعلق ایک اختلافی نوٹ بھی درج کرایا ہے۔

بھارت ایکسپریس اردو