پنجاب میں وزیر سنجیو اروڑہ کے گھر ای ڈی کی چھاپہ ماری، وزیراعلیٰ بھگونت مان نے بی جے پی پر لگائے بڑے الزام

پنجاب میں کابینی وزیرسنجیو اروڑہ کی مشکلات میں اضافہ ہوگیا ہے۔ چنڈی گڑھ واقع ان کی رہائش گاہ پرانفورسمنٹ ڈائریکٹوریٹ (ای ڈی) نے چھاپہ ماری کی ہے۔ چھاپہ ماری پروزیراعلیٰ بھگونت مان نے بی جے پی پرتنقید کی ہے۔ بھگونت مان نے کہا کہ پنجاب ای ڈی-بی جے پی کے اس غلط اتحاد کوختم کردے گا۔

انفورسمنٹ ڈائریکٹوریٹ (ای ڈی) نے منی لانڈرنگ کی روک تھام کا ایکٹ (پی ایم ایل اے)، 2002 کے تحت سنجیواروڑہ اوران کے ساتھیوں سے منسلک اداروں کے خلاف 4 مقامات پر تلاشی مہم چلائی۔ یہ کارروائی چنڈی گڑھ اوردہلی این سی آرعلاقے میں کی جارہی ہے۔ تلاشی جن مقامات پرہورہی ہے، ان میں وزیرکے طورپرسنجیو اروڑہ کو الاٹ سرکاری رہائش گاہ بھی شامل ہے۔

بھگونت مان نے بی جے پی پرلگایا بڑا الزام

پنجاب کے وزیراعلیٰ بھگونت مان نے کہا کہ آج پھر بی جے پی کی ای ڈی سنجیواروڑہ کے گھرآئی ہے۔ ایک سال میں یہ تیسری بارہے کہ جب بی جے پی-ای ڈی ان کے گھرآئی ہے اورایک ماہ میں دوسری بار۔ پھربھی انہیں کچھ نہیں ملا۔ میں مودی جی کو بتانا چاہتا ہوں کہ پنجاب گرووں کی سرزمین ہے، اسے اورنگ زیب بھی نہیں جھکا سکا۔ یہ بھگت سنگھ کی سرزمین ہے، جو کبھی انگریزوں کے آگے نہیں جھکے، اس لئے پنجاب بھی مودی کی چال بازیوں کے آگے نہیں جھکے گا۔ پنجاب ای ڈی-بی جے پی کے اس غلط اتحاد کو ختم کردے گا۔

معاملے میں شرومنی اکالی دل کے لیڈروکرم سنگھ مجیٹھیا نے ٹوئٹ کرکے لکھا کہ سب پکڑے جائیں گے۔ انہوں نے کہا کہ ای ڈی کی ٹیم تقریباً 20 گاڑیوں کے ساتھ سیکٹر-2 واقع وزیرتوانائی اورعام آدمی پارٹی کے رکن اسمبلی اور”منی ایکسچینجر“ سنجیواروڑہ کی رہائش گاہ پرچھاپہ ماری کرنے پہنچی۔ اس مہم کے دوران ای ڈی کی ٹیم کے ساتھ سی آئی ایس ایف اورسی آرپی ایف کے جوان بھی موجود تھے۔

بھارت ایکسپریس اردو-