Arvind Kejriwal Arrest: کیجریوال نے اگر استعفیٰ دیا تو کون ہوگا دہلی کا وزیر اعلیٰ؟ یہاں جانئے تفصیل

دہلی کے وزیراعلیٰ اروند کیجریوال کو انفورسمنٹ ڈائریکٹوریٹ (ای ڈی) نے جمعرات کی شام گرفتارکرلیا ہے۔ ای ڈی نے انہیں دہلی شراب پالیسی معاملے میں گرفتارکیا ہے اور اب انہیں عدالت میں پیش کیا جائے گا۔ عدالت سے اگرراحت نہیں ملتی ہے تو انہیں جانا پڑسکتا ہے۔ وہیں عام آدمی پارٹی کے تمام لیڈران مسلسل دعوے کے ساتھ کہہ رہے ہیں کہ کیجریوال وزیراعلیٰ عہدے سے استعفیٰ نہیں دیں گے بلکہ جیل سے ہی حکومت چلائیں گے۔ تاہم جیل ضابطے کے مطابق یہ عملی طورپرممکن نہیں ہے۔ ایسے میں اگرکیجریوال کو استعفیٰ دینا پڑتا ہے تو ان کی جگہ دہلی میں آخر کون وزیراعلیٰ ہوگا؟

کیجریوال کی گرفتاری کے بعد سے عام آدمی پارٹی کے لیڈراور دہلی حکومت میں وزیرسوربھ بھاردواج اورآتشی مارلینا نے واضح الفاظ میں کہہ دیا ہے کہ وزیراعلیٰ عہدے سے کیجریوال استعفیٰ نہیں دیں گے۔ وزیراعلیٰ وہ ہیں اور وہی رہیں گے۔ جیل سے ہی حکومت چلائیں گے۔ اس بات کو اسمبلی اسپیکررام نواس گوئل نے بھی واضح کردیا ہے کہ اروند کیجریوال وزیراعلیٰ عہدے سے استعفیٰ نہیں دیں گے۔ حالانکہ جیل میں جانے پروزیراعلیٰ کو استعفیٰ دینے کا کوئی التزام نہیں ہے، لیکن جیل میں رہ کرحکومت چلانے کی ملک میں کوئی مثال نہیں ملتی ہے۔

اروند کیجریوال کی گرفتاری سے پہلے ہی عام آدمی پارٹی کے تین بڑے لیڈران جیل میں ہیں۔ عام آدمی پارٹی کے لیڈراور سابق نائب وزیراعلیٰ منیش سسودیا، سابق وزیر ستیندر جین اور راجیہ سبھا رکن پارلیمنٹ سنجے سنگھ جیل میں ہیں۔ اس کے سبب عام آدمی پارٹی پہلے سے قیادت کے بحران سے جدوجہد کر رہی ہے اوراب اروند کیجریوال کی گرفتاری سے مشکل کھڑی ہوگئی ہے۔ ذرائع کی مانیں تواروند کیجریوال کو استعفیٰ دینے کی نوبت آتی ہے تو پھردہلی حکومت میں وزیرآتشی مارلینا اورگوپال رائے میں سے کسی ایک کو وزیراعلیٰ بنایا جاسکتا ہے۔