اروندر سنگھ لولی سے ملنے پہنچے کانگریس کے سابق ایم ایل اے آصف محمد خان سے بدسلوکی، حامیوں نے سوسائٹی سے نکالا

دہلی میں اوکھلا سے سابق رکن اسمبلی آصف محمد خان کے ساتھ بدسلوکی کا معاملہ سامنے آیا ہے۔ آصف محمد خان کانگریس لیڈر اروندر سنگھ لولی سے ملنے کے لئے پہنچے تھے۔ انہوں نے اروندر سنگھ لولی اورسبھاش چوپڑا کی بی جے پی سے ملی بھگت کا الزام لگایا، جس کے بعد وہاں موجود کانگریس کارکنان نے ان سے جم کر بدسلوکی کی۔ یہاں تک کہ کچھ کارکنان انہیں دھکا دیتے ہوئے بھی نظرآئے اورآخرمیں سوسائٹی سے باہرنکال دیا۔

آصف محمد خان کا کہنا ہے کہ وہ بھی عام آدمی پارٹی سے الائنس کے حق میں نہیں تھے، لیکن اب اعلیٰ کمان نے فیصلے لے لئے تو ہم اس کے ساتھ ہیں۔ اعلیٰ کمان کو اروندرسنگھ لولی، سبھاش چوپڑا اورراجکمارچوہان کے خلاف کارروائی کرنی چاہئے، جس کے بعد اروندر سنگھ لولی کے گھر کے باہرموجود کارکنان نے جم کرآصف محمد خان کے ساتھ بدسلوکی کی، مارپیٹ اور دھکا مکی کے ساتھ انہیں سوسائٹی سے باہر نکال دیا گیا۔

اروندرسنگھ لولی کے استعفیٰ پرکانگریس کے سابق رکن اسمبلی آصف محمد خان نے کہا ہے کہ پارٹی میں اختلافات ہوسکتے ہیں۔ اگرلولی مایوس تھے اور استعفیٰ دینا چاہتے تھے تو خاموشی سے پارٹی کے صدرملیکا ارجن کھڑگے کو اپنا استعفیٰ دے دیتے۔ انہوں نے کہا کہ جس طرح سے لولی نے کھلے عام میڈیا میں جو خط جاری کیا ہے، اس سے ایک طرح سے راست طور پر بی جے پی کو فائدہ ہو رہا ہے۔ میں اتنا کہہ سکتا ہوں کہ آئندہ ایک دو دن میں ہرش ملہوترا کی جگہ لولی کو امیدوار ڈکلیئرکردیا جائے گا۔

کانگریس نے ناراضگی کا حل نکالنے کا دیا حکم